മട്ടാഞ്ചേരി: ബിസിനസ് പങ്കാളിയാക്കാമെന്ന് പറഞ്ഞ് യുവാക്കള്‍ക്കിടയില്‍ കഞ്ചാവ് വില്‍പന നടത്തുന്നയാള്‍ ഫോര്‍ട്ട്‌കൊച്ചി പൊലിസിന്റെ പിടിയിലായി. പള്ളുരുത്തി കാപ്പില്‍ വീട്ടില്‍ സിബി കാപ്പനെ(47) ആണ് ഫോര്‍ട്ട്‌കൊച്ചി എസ്.ഐ അനീഷ് കുമാറിന്റെ നേതൃത്വത്തില്‍ പിടികൂടിയത്. ഞായറാഴ്ച രാത്രിയില്‍ വാഹന പരിശോധനക്കിടെയാണ് പിടിയിലായത്.
നല്ല രീതിയില്‍ വേഷം ധരിച്ച് ബിസിനസ് പങ്കാളിയാക്കാമെന്ന് പറഞ്ഞ് ആവശ്യക്കാര്‍ക്ക് കഞ്ചാവ് വില്‍പന നടത്തി വരികയായിരുന്നു ഇയാളെന്ന് പൊലിസ് പറഞ്ഞു. പിടിയിലാകുമ്പോള്‍ ഇയാളുടെ കൈവശം അരക്കിലോ കഞ്ചാവുമുണ്ടായിരുന്നു.
എ.എസ്.ഐ രഘുനന്ദന്‍, സിവില്‍ പൊലിസ് ഓഫീസര്‍മാരായ സതീശന്‍, ജോണ്‍,സനല്‍ എന്നിവരും പ്രതിയെ പിടികൂടിയ സംഘത്തിലുണ്ടായിരുന്നു. ഇയാള്‍ക്ക് വണ്ടിപ്പെരിയാര്‍ എക്‌സൈസിലും കേസ് നിലവിലുണ്ട്.

'ട്രിപ്പിള്‍' സവാരിക്കിറങ്ങിയ
കുട്ടികളെ നാട്ടുകാര്‍ പിടികൂടി
ഏലൂര്‍: ഇരുചക്രവാഹനത്തില്‍ 'ട്രിപ്പിള്‍' സവാരിക്കിറങ്ങിയ കുട്ടികളെ നാട്ടുകാര്‍ പിടികൂടി പൊലിസില്‍ ഏല്‍പ്പിച്ചു. 14 വയസുള്ള മൂന്ന് കുട്ടികളാണ് വാഹനത്തിരക്കേറിയ വഴിയില്‍ കറങ്ങാനെത്തിയത്.
പുതിയറോഡ് ജങ്ഷനില്‍ മറ്റൊരു ബൈക്കുമായി കൂട്ടിയിടിക്കാന്‍ പോയപ്പോഴാണ് നാട്ടുകാര്‍ ഇടപെട്ടത്. പ്രായപൂര്‍ത്തിയാകാത്ത കുട്ടികളായതുകൊണ്ട് പൊലിസിനെ അറിയിച്ച് കുട്ടികളെ ഏല്‍പ്പിക്കുകയായിരുന്നു. ഏലൂര്‍ പൊലിസ് സ്ഥലത്തെത്തി കുട്ടികളില്‍ ഒരാളുടെ സഹോദരനെ വിളിച്ചുവരുത്തി കുട്ടികളെ പറഞ്ഞയച്ചു.
ബൈക്ക് കസ്റ്റഡിയിലെടുത്ത് സ്റ്റേഷനില്‍ സൂക്ഷിച്ചിരിക്കുകയാണ്. വിശദമായ അന്വേഷണങ്ങള്‍ക്ക് ശേഷം നിയമനടപടികളെടുക്കുമെന്ന് പൊലിസ് പറഞ്ഞു.