തിരുവനന്തപുരം: സംസ്ഥാനത്തെ ഡയറ്റുകളില്‍ അധ്യാപക നിയമനം വൈകുന്നതില്‍ വന്‍പ്രതിഷേധം. സ്‌പെഷ്യല്‍ റൂള്‍ രൂപീകരിച്ച് ആറു വര്‍ഷം കഴിഞ്ഞിട്ടും നിയമനം നടന്നിട്ടില്ല. ഉടന്‍ നിയമന നടപടിയില്ലെങ്കില്‍ കോടതിയെ സമീപിക്കുമെന്ന് ഉദ്യോഗാര്‍ഥികള്‍ പറയുന്നു.
മുഖ്യമന്ത്രി, വിദ്യാഭ്യാസമന്ത്രി, പൊതുവിദ്യാഭ്യാസ ഡയറക്ടര്‍ എന്നിവര്‍ക്ക് നിരവധി നിവേദനങ്ങള്‍ നല്‍കിയിട്ടും ചുവപ്പുനാടയില്‍ കുരുങ്ങി തീരുമാനം നീണ്ടുപോവുകയാണെന്നും ഉദ്യോഗാര്‍ഥികള്‍ ആരോപിച്ചു. ഈ സാഹചര്യത്തില്‍ നിയമന നടപടികള്‍ വേഗത്തിലാക്കണമെന്നാണ് ആവശ്യം.
ഉദ്യോഗാര്‍ഥികള്‍ ദീര്‍ഘകാലമായി ആവശ്യപ്പെട്ടതിനൊടുവില്‍ 2011 ഫെബ്രുവരിയിലാണ് ഡയറ്റുകളിലെ അധ്യാപക നിയമനത്തിന് സ്‌പെഷ്യല്‍ റൂള്‍ നിലവില്‍ വന്നത്. വിവിധ വിഭാഗങ്ങളില്‍ നിന്ന് ലഭിച്ച നിവേദനങ്ങളുടെയും അടിസ്ഥാനത്തിലാണ് സ്‌പെഷ്യല്‍ റൂളിന് രൂപം നല്‍കിയത്. 2015ല്‍ പൊതുവിദ്യാഭ്യാസവകുപ്പില്‍ നിന്നും വിവരാവകാശ നിയമപ്രകാരം ലഭിച്ച മറുപടിയില്‍ 79 ഒഴിവുകള്‍ ഉണ്ടെന്നാണ് വ്യക്തമാക്കിയിരുന്നത്. ഇതില്‍ പകുതിയോളം ഒഴിവുകള്‍ പി.എസ്.സിക്ക് റിപ്പോര്‍ട്ട് ചെയ്തിരുന്നു.
എന്നാല്‍ സ്‌പെഷ്യല്‍ റൂളില്‍ അപാകതയുള്ളതിനാല്‍ പി.എസ്.സിക്ക് നിയമന നടപടികള്‍ ആരംഭിക്കാന്‍ കഴിയുന്നില്ല. അപാകതകള്‍ ഉടന്‍ പരിഹരിക്കണമെന്ന് ആവശ്യപ്പെട്ട് പി.എസ്.സി പലതവണ പൊതുവിദ്യാഭ്യാസ വകുപ്പിന് കത്തയച്ചെങ്കിലും യാതൊരു പ്രതികരണവുമുണ്ടായിട്ടില്ല.
ചട്ടങ്ങളിലെ അപാകതകള്‍ പരിഹരിക്കുന്നതിനുള്ള നിര്‍ദേശങ്ങള്‍ സമര്‍പ്പിക്കുന്നതിനായി ഒരു വിദഗ്ധ കമ്മിറ്റിക്ക് രൂപം നല്‍കിയിരുന്നു. ഈ സമിതിയുടെ ശുപാര്‍ശകള്‍ സര്‍ക്കാര്‍ അംഗീകരിച്ച് പൊതുവിദ്യാഭ്യാസ വകുപ്പില്‍ നിന്ന് ഭരണപരമായ ഉത്തരവ് ഇറങ്ങേണ്ടതുണ്ട്. ഇതിനുശേഷം ഇക്കാര്യം പി.എസ്.സിയെ അറിയിച്ചാല്‍ മാത്രമേ നിയമന വിജ്ഞാപനം ഇറക്കാന്‍ കഴിയൂവെന്നാണ് അധികൃതര്‍ പറയുന്നത്.
ആയിരക്കണക്കിന് ഉദ്യോഗാര്‍ഥികള്‍ എം.എഡ്, നെറ്റ്, ജെ.ആര്‍.എഫ്, പി.എച്ച്.ഡി തുടങ്ങിയ അധികയോഗ്യതകളും നേടി ജോലിക്ക് അപേക്ഷിക്കാന്‍ കാത്തിരിപ്പ് തുടങ്ങിയിട്ട് വര്‍ഷങ്ങളേറെയായി. യോഗ്യതയുള്ള പലര്‍ക്കും അപേക്ഷിക്കാനുള്ള പ്രായപരിധി അവസാനിക്കാറായി.
സ്‌കൂള്‍ വിദ്യാഭ്യാസ രംഗത്ത് ഗവേഷണവും പരിശീലനവും നടത്തുന്ന സ്ഥാപനമാണ് ഡയറ്റ്. ഒരു ഡയറ്റില്‍ ഏഴ് ഫാക്കല്‍റ്റിയിലായി 20 അധ്യാപകരാണ് വേണ്ടത്. എന്നാല്‍, വര്‍ഷങ്ങളായി നിയമനം നടത്താത്തതിനാല്‍ പകുതിയില്‍ താഴെ മാത്രം അധ്യാപകരാണുള്ളത്.
ഇതോടെ ഡയറ്റുകളുടെ പ്രവര്‍ത്തനം തന്നെ താളംതെറ്റിയ അവസ്ഥയിലുമാണ്.