കോഴിക്കോട്: എല്‍.ഡി.എഫ് സ്വതന്ത്രന്‍ പി.വി അന്‍വര്‍ എം.എല്‍.എയുടെ പാര്‍ക്കിന് അനുകൂലമായുള്ള കോണ്‍ഗ്രസ് മണ്ഡലം കമ്മിറ്റിയുടെ റിപ്പോര്‍ട്ട് ജില്ലാ നേതൃത്വം തള്ളി.
നടപടിക്രമങ്ങള്‍ പാലിച്ചാണ് പഞ്ചായത്ത് പാര്‍ക്കിന് അനുമതി നല്‍കിയതെന്നാണ് ഡി.സി.സിക്കും കെ.പി.സി.സിക്കും കൂടരഞ്ഞി മണ്ഡലം കോണ്‍ഗ്രസ് കമ്മിറ്റി നല്‍കിയ റിപ്പോര്‍ട്ടിലുള്ളത്. നടപടി ക്രമങ്ങളില്‍ കെ.പി.സി.സി വീഴ്ച ചൂണ്ടിക്കാട്ടിയാല്‍ തിരുത്താന്‍ തയാറാണെന്നും റിപ്പോര്‍ട്ടില്‍ പറയുന്നു. വിവാദമായ പാര്‍ക്കിന് അനുമതി നല്‍കിയ കോണ്‍ഗ്രസ് പഞ്ചായത്ത് ഭരണസമിതിക്കെതിരേ പാര്‍ട്ടിക്കുള്ളില്‍ പ്രതിഷേധമുയര്‍ന്നതിനെ തുടര്‍ന്ന് കെ.പി.സി.സി കോഴിക്കോട് ജില്ലാ കമ്മിറ്റിയോടും കൂടരഞ്ഞി മണ്ഡലം കമ്മിറ്റിയോടും റിപ്പോര്‍ട്ട് ആവശ്യപ്പെട്ടിരുന്നു. ഇതുപ്രകാരം മണ്ഡലം കമ്മിറ്റി നല്‍കിയ റിപ്പോര്‍ട്ടിലാണ് പഞ്ചായത്ത് ഭരണസമിതിയെ പിന്തുണച്ച് പാര്‍ക്കിന് അനുകൂല റിപ്പോര്‍ട്ട് നല്‍കിയിരിക്കുന്നത്.
പ്രാദേശിക വികാരം പാര്‍ക്കിന് അനുകൂലമാണെന്നും അനുമതിയുള്ളതിനാലാണ് കക്കാടംപൊയിലിലെ പാര്‍ക്കിനെ പിന്തുണച്ചതെന്നും റിപ്പോര്‍ട്ടില്‍ പറയുന്നു. ഇക്കാര്യത്തില്‍ പ്രദേശിക നേതൃത്വത്തിന് വീഴ്ചപറ്റിയിട്ടില്ലെന്നും റിപ്പോര്‍ട്ടില്‍ സൂചിപ്പിക്കുന്നുണ്ട്.
എന്നാല്‍ റിപ്പോര്‍ട്ട് ഡി.സി.സി തള്ളി. പാര്‍ക്കിനെതിരേ നടപടിയെടുക്കണമെന്നും പ്രാദേശിക കോണ്‍ഗ്രസ് കമ്മിറ്റി നല്‍കിയ റിപ്പോര്‍ട്ടിനെ പൂര്‍ണമായും അംഗീകരിക്കാന്‍ കഴിയില്ലെന്നും ഡി.സി.സി പ്രസിഡന്റ് ടി. സിദ്ദിഖ് പറഞ്ഞു. മലനീകരണ നിയന്ത്രണ ബോര്‍ഡിന്റെ അനുമതിയില്ലാത്ത പാര്‍ക്കിനെ മുഖ്യമന്ത്രി പോലും പിന്തുണക്കുകയാണ്. പാര്‍ക്കിനെതിരേ കോണ്‍ഗ്രസ് പ്രക്ഷോഭം ശക്തമാക്കുമെന്നും അദ്ദേഹം പറഞ്ഞു.
അതേസമയം ഇന്നലെ കോഴിക്കോട് എത്തിയ പ്രതിപക്ഷ നേതാവ് രമേശ് ചെന്നിത്തല പഞ്ചായത്ത് ഭരണസമിതിയെ തള്ളിപ്പറയാന്‍ തയാറായില്ല. പഞ്ചായത്ത് ഏറ്റവും താഴെയുള്ള ഘടകം മാത്രമാണെന്നും അതിനുമുകളിലുള്ള അധികാരകേന്ദ്രങ്ങള്‍ മുതല്‍ മുഖ്യമന്ത്രിവരെ പാര്‍ക്കിനെ പിന്തുണക്കുകയാണെന്നും ചെന്നിത്തല പറഞ്ഞു.