ന്യൂഡല്‍ഹി: 2002ലെ ഗുജറാത്ത് വംശഹത്യ സമയത്ത് തകര്‍പ്പെട്ട ആരാധനാലയങ്ങള്‍ക്ക് സംസ്ഥാന സര്‍ക്കാര്‍ നഷ്ടപരിഹാരം നല്‍കണമെന്ന ഗുജറാത്ത് ഹൈക്കോടതി വിധി സുപ്രിം കോടതി റദ്ദാക്കി. വംശഹത്യ തടയുന്നതിലും സംസ്ഥാനത്തെ ക്രമസമാധാനനില സംരക്ഷിക്കുന്നതിലും അന്നത്തെ സംസ്ഥാന സര്‍ക്കാര്‍ പരാജയപ്പെട്ടതിനാല്‍ തകര്‍ക്കപ്പെട്ട ആരാധനാലയങ്ങളുടെ പുനര്‍നിര്‍മാണത്തിന് സര്‍ക്കാര്‍ ഫണ്ട് നല്‍കണമെന്നായിരുന്നു ഗുജറാത്ത് ഹൈക്കോടതി വിധിച്ചിരുന്നത്.
2012ലെ ഹൈക്കോടതി ഉത്തരവ് ചോദ്യം ചെയ്ത് ഗുജറാത്ത് സര്‍ക്കാര്‍ നല്‍കിയ ഹരജി പരിഗണിച്ച ചീഫ് ജസ്റ്റിസ് ദീപക് മിശ്ര, ജസ്റ്റിസ് പ്രഫുല്ല സി പന്ത് എന്നിവരടങ്ങിയ ബെഞ്ചാണ് ഹൈക്കോടതി ഉത്തരവ് റദ്ദാക്കിയത്.
ഗോധ്ര കലാപാനന്തരം നടന്ന ആക്രമണങ്ങളില്‍ 500ലധികം തീര്‍ഥാടന കേന്ദ്രങ്ങള്‍ തകര്‍ക്കപ്പെടുകയോ കേടുപാടുകള്‍ സംഭവിക്കുകയോ ചെയ്തതായി ജില്ലാ ജഡ്ജിമാര്‍ നിര്‍ണയിക്കുകയും അതിന് മൂല്യം കണക്കാക്കുകയും ചെയ്തതിനെ തുടര്‍ന്നാണ് 2012 ഫെബ്രുവരി എട്ടിന് നഷ്ടപരിഹാരം നല്‍കാന്‍ ഉത്തരവിട്ടത്. എന്നാല്‍, കലാപ സമയത്ത് തകര്‍ത്ത പാര്‍പ്പിട, വാണിജ്യ ആസ്തികള്‍ക്ക് നല്‍കാന്‍ നിശ്ചയിച്ച നഷ്ടപരിഹാര തുക കേടുപാടുകള്‍ സംഭവിച്ച ആരാധനാലയങ്ങള്‍ക്കും നല്‍കുമെന്ന് സംസ്ഥാന സര്‍ക്കാരിന് വേണ്ടി ഹാജരായ അഡീഷനല്‍ സോളിസിറ്റര്‍ ജനറല്‍ തുഷാര്‍ മെഹ്ത സുപ്രിം കോടതിയില്‍ അറിയിച്ചു.