അങ്കമാലി: രാത്രികാലങ്ങളില്‍ ഗുഡ്‌സ് ഓട്ടോറിക്ഷയില്‍ കറങ്ങി നടന്ന് പണിസ്ഥലങ്ങളില്‍ നിന്നും ഇരുമ്പ് കമ്പികളും ഇരുമ്പ് ആംഗ്ലയറുകളും മോഷ്ടിക്കുന്ന ആളുകളെ അങ്കമാലി പൊലിസ് അറസ്റ്റ് ചെയ്തു.
മലപ്പുറം കരുവാരകുണ്ട് പുന്നക്കാട് കിളിക്കോട് ഭാഗത്ത് താമസിക്കുന്ന പട്ടികാടന്‍ വീട്ടില്‍ സുഹൈല്‍ (32) എടത്തലയ്ക്ക് സമീപം എന്‍.എ.ഡിയില്‍ വാടകയ്ക്ക് താമസിക്കുന്ന തൃശൂര്‍ പൂങ്കുന്നം മൂത്തേടത്ത് വിട്ടില്‍ അനുരാജ് (36) എന്നിവരെയാണ് അങ്കമാലി പൊലിസ് പിടിക്കുടിയത്. ഇന്നലെ അങ്കമാലി പൊലിസ് സബ് ഇന്‍സ്‌പെക്ടര്‍ കെ.എന്‍ മനോജിന്റെ നേതൃത്വത്തില്‍ നടത്തിവന്നിരുന്ന നൈറ്റ് പെട്രോളിങിനിടെ കറുകുറ്റി അരിയ്ക്കല്‍ ജങ്ഷനില്‍ വച്ച് പുലര്‍ച്ചെ 2.30 ഓടെയാണ് മോഷ്ടാക്കളെ പിടികൂടിയത്. എയര്‍പോര്‍ട്ട് റോഡിന്റെ സമീപം സുക്ഷിച്ചിരുന്ന 35 ഇരുമ്പ് ആംഗ്ലിയറുകള്‍ മോഷ്ടിച്ച് ചാലക്കുടി ഭാഗത്തേയ്ക്ക് കൊണ്ടു പോകുന്നതിനിടെയാണ് പ്രതികള്‍ പിടിയിലാകുന്നത്. പൊലിസ് ആദ്യം നടത്തിയ ചോദ്യം ചെയ്യലില്‍ വാഹനത്തില്‍ ഇരുമ്പ് ആംഗ്ലയറുകള്‍ ചാലക്കുടിയിലുള്ള പണിസ്ഥലത്തേയ്ക്ക് കൊണ്ടു പോകുന്നുവെന്നാണ് പറഞ്ഞത്. എന്നാല്‍ സാധനം വാങ്ങിയതിന്റെ ബില്ലോ കടയുടെ പേരോ ചോദിച്ചപ്പോള്‍ ബില്ല് കൈയിലില്ലെന്നും കടയേതെന്ന് അറയില്ലെന്നുമാണ് പ്രതികള്‍ പറഞ്ഞത്. സംശയം തോന്നിയ പൊലിസ് പ്രതികളെ കസ്റ്റഡിയിലെടുത്ത് ചോദ്യം ചെയ്തപ്പോഴാണ് മോഷണവിവരം പുറത്തറിയുന്നത് .
അങ്കമാലി പോലീസ് സര്‍ക്കിള്‍ ഇന്‍സ്‌പെക്ടര്‍ മുഹമ്മദ് റിയാസിന്റെ നിര്‍ദ്ദേശ പ്രകാരം നടത്തിയ പരിശോധനയ്ക്ക് പോലിസ് സബ് ഇന്‍സ്‌പെക്ടര്‍മാരായ കെ എന്‍ മനോജ് , കെ സി രമേഷ് ,അസിസ്റ്റന്റ് സബ് ഇന്‍സ്‌പെക്ടര്‍മാരായ സുകേശന്‍ , എസ് സി പി ഒ വിമല്‍ ,സി പി ഒ മാരായ സി പി ഒ സുധീഷ് , റോണി തുടങ്ങിയവര്‍ നേതൃത്വം നല്‍കി. പ്രതികളെ അങ്കമാലി മജിസ്‌ട്രേറ്റ് കോടതിയില്‍ ഹാജരാക്കി.