തിരുവനന്തപുരം: ഇന്ത്യ ന്യൂസിലന്‍ഡ് ടി20 മത്സരം നടക്കാനിരിക്കുന്ന ഗ്രീന്‍ഫീല്‍ഡ് സ്റ്റേഡിയം ബി.സി.സി.ഐ, ഐ.സി.സി ഉന്നത സംഘം പരിശോധിച്ചു. ബുധനാഴ്ച്ച വൈകിട്ടോടെയാണ് സംഘം ഗ്രൗണ്ട് പരിശോധനക്കെത്തിയത്. ഐ.സി.സി മാച്ച് റഫറി ജവഗല്‍ ശ്രീനാഥിന്റെ നേതൃത്വത്തിലുള്ള സംഘത്തില്‍ ബി.സി.സി.ഐ അഴിമതി വിരുദ്ധ സമിതി തലവന്‍ എന്‍. എസ് വിര്‍ക്ക്, ബി.സി.സി.ഐ ജനറല്‍ മാനേജര്‍ എം.വി ശ്രീധര്‍, സൗത്ത് സോണ്‍ ക്യൂറേറ്റര്‍ പി.ആര്‍ വിശ്വനാഥന്‍ എന്നിവരാണുണ്ടായിരുന്നത്.
ഗ്രൗണ്ടിന് പുറമെ, അടിസ്ഥാന സൗകര്യങ്ങള്‍, ഫഌഡ്‌ലിറ്റ് , കളിക്കാരുടെ ഡ്രസിങ്ങ് റൂം, ഡൈനിങ് ഏരിയ, മീഡിയാ റൂം , മെഡിക്കല്‍ സൗകര്യങ്ങള്‍ എന്നിവ സംഘം പരിശോധിച്ചു. എല്ലാ സൗകര്യങ്ങളുമുള്ള അതിമനോഹരമായ സ്റ്റേഡിയമാണിതെന്ന് സംഘം കേരള ക്രിക്കറ്റ് അസോസിയേഷന്‍ ഭാരവാഹികളെ അറിയിച്ചു. ഗ്രൗണ്ട് സംബന്ധിച്ച റിപ്പോര്‍ട്ട് സംഘം ഐ.സി.സിക്ക് സമര്‍പ്പിക്കുമെന്ന് ബി.സി.സി.ഐ വൈസ് പ്രസിഡന്റ് ടി.സി മാത്യു അറിയിച്ചു.
കെ.സി.എ പ്രസിഡന്റ് ബി വിനോദ് കുമാര്‍, കെ.സി.എ സെക്രട്ടറി ജയേഷ് ജോര്‍ജ്, വൈസ് പ്രസിഡന്റുമാരായ നാസര്‍ മച്ചാന്‍, രജിത് രാജേന്ദ്രന്‍, തിരുവനന്തപുരം ജില്ലാ ക്രിക്കറ്റ് അസോസിയേഷന്‍ സെക്രട്ടറി വിനോദ് എസ് കുമാര്‍ എന്നിവരും സംഘത്തെ അനുഗമിച്ചു.