മുംബൈ:  മുംബൈയില്‍ ബഹു നിലകെട്ടിടം തകര്‍ന്ന് മൂന്നു പേര്‍ മരിച്ചു. മുംബൈയിലെ ഭിണ്ടി ബസാര്‍ ഏരിയയിലാണ് അപകടം. നിരവധിയാളുകള്‍ കെട്ടിടത്തിനുള്ളില്‍ കുടുങ്ങിക്കിടക്കുന്നതായാണ് റിപ്പോര്‍ട്ട്.

ഇന്ന് രാവിലെ 8.42 നാണ്  അപകടം നടന്നത്. പാക്‌മോദിയ തെരുവിലെ മൗലാന ഷൗക്കത്ത് അലി റോഡിലുള്ള അര്‍സിവാല എന്ന കെട്ടിടമാണ് തകര്‍ന്നത്. 110 വര്‍ഷം പഴക്കമുള്ള കെട്ടിടമാണിത്. ഏകദേശം 24 പേര്‍ താമസിക്കുന്നുണ്ടെന്നാണ് വിവരം. അപകട സമയത്ത് എത്രപേര്‍ കെട്ടിടത്തിലുണ്ടായിരുന്നുവെന്ന് വ്യക്തമായിട്ടില്ല.

10 യൂണിറ്റ് അഗ്‌നിശമന സേനയും രക്ഷാപ്രവര്‍ത്തനത്തിന് എത്തിച്ചേര്‍ന്നിട്ടുണ്ട്.  ദേശീയ ദുരന്തനിവാരണ സേനയും  രക്ഷാപ്രവര്‍ത്തനത്തില്‍ പങ്കെടുക്കുന്നുണ്ട്.

പരുക്കേറ്റവരെ സമീപത്തെ ജെ.ജെ ആശുപത്രിയില്‍ പ്രവേശിപ്പിച്ചു.