കയ്പമംഗലം: പെരിഞ്ഞനം ഗ്രാമപഞ്ചായത്തിലെ വീടുകളില്‍ അടിഞ്ഞു കൂടുന്ന മാലിന്യങ്ങള്‍ ഇനി ഭരണികളില്‍ സംഭരിക്കും. ക്ലീന്‍ പെരിഞ്ഞനം പദ്ധതിയുടെ ഭാഗമായാണ് പൊതുജന ആരോഗ്യത്തിന് ഹാനികരമാവാത്ത രീതിയില്‍ മാലിന്യം സംഭരിക്കുന്നത്. പദ്ധതിയുടെ ഭാഗമായി പെരിഞ്ഞനം പഞ്ചായത്തില്‍ മാലിന്യം സംസ്‌കരണത്തിനായുള്ള ഭരണികള്‍ വിതരണം ചെയ്തു. വീടുകളില്‍ ഉണ്ടാകുന്ന മാലിന്യങ്ങള്‍ ഭരണികളില്‍ സംഭരിച്ച് പ്രത്യേക രീതിയില്‍ സംസ്‌കരിക്കുന്നതോടെ പകര്‍ച്ചാ വ്യാധികള്‍ പടര്‍ന്നു പിടിക്കുന്നതില്‍ നിന്നും കൊതുകുകള്‍ മുട്ടയിട്ട് പെരുകുന്നതില്‍ നിന്നും പെരിഞ്ഞനം ഗ്രാമപഞ്ചായത്ത് മുക്തമാകും.
പൊതുജന ആരോഗ്യ സംരക്ഷണത്തിന് ഊന്നല്‍ നല്‍കി നടപ്പിലാക്കുന്ന പദ്ധതിക്ക് വലിയ ജനപിന്തുണയാണ് ലഭിച്ചതെന്ന് ഗ്രാമപഞ്ചായത്ത് ഭരണസമിതി അംഗങ്ങള്‍ വ്യക്തമാക്കി. പഞ്ചായത്തിലെ നാനൂറ് വീടുകളിലേക്ക് മാലിന്യം സംഭരിക്കുന്നതിനായി ഭരണികള്‍ വിതരണം ചെയ്തു. ഗ്രാമപഞ്ചായത്ത് പ്രസിഡന്റ് കെ.കെ സച്ചിത്ത് വിതരണോദ്ഘാദനം നിര്‍വഹിച്ചു.
വികസനകാര്യ സ്റ്റാന്റിംഗ് കമ്മിറ്റി ചെയര്‍മാന്‍ പി.വി സതീശന്‍ അധ്യക്ഷനായി. വൈസ് പ്രസിഡന്റ് സായിദ മുത്തുക്കോയ , ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയര്‍മാന്‍ പി.എ സുധീര്‍, പഞ്ചായത്ത് സെക്രട്ടറി എന്‍.എം അബ്ദുല്‍ ജലീല്‍ സംസാരിച്ചു.