മക്ക: വിശുദ്ധ കഅ്ബയുടെ ഉടയാടയായ നിലവിലെ കിസ്‌വ മാറ്റി പുതിയത് അണിയിച്ചു. അറഫാ ദിനമായ ഇന്നലെ സുബ്ഹി നിസ്‌കാരത്തിന് ശേഷമാണ് ചടങ്ങുകള്‍ നടന്നത്. വര്‍ഷത്തില്‍ ഒരു തവണ മാറുന്ന ചടങ്ങാണ് ഈ വര്‍ഷം അറഫാ സംഗമദിനത്തില്‍ നടന്നത്. ഹാജിമാര്‍ എല്ലാവരും അറഫയില്‍ ഒത്തുചേരുന്നതിനാല്‍ മക്കയില്‍ തിരക്ക് വളരെ കുറവാകുമെന്നതിനാലാണ് അറഫദിനത്തില്‍ കിസ്‌വ മാറ്റം നടന്നത്.
നിലവില്‍ ഉ@ണ്ടായിരുന്ന കിസ്‌വ പൂര്‍ണമായും അഴിച്ചെടുത്ത ശേഷമാണ് പുതിയ കിസ്‌വ അണിയിച്ചത്. ഹറം കാര്യാലയ മേധാവികളുടെ നേതൃത്വത്തില്‍ കിസ്‌വ ഫാക്ടറി ഉദ്യോഗസ്ഥരും ഹറം കാര്യാലയ ഉദ്യോഗസ്ഥരും അടങ്ങുന്ന സംഘമാണ് ചടങ്ങ് നടത്തിയത്. വര്‍ഷത്തില്‍ ഒരു തവണയാണ് കിസ്‌വ മാറ്റല്‍ ചടങ്ങു നടക്കാറുള്ളത്. ഒരു വര്‍ഷത്തോളമെടുത്ത് നിര്‍മിക്കുന്ന കിസ്‌വക്ക് 2.2 കോടിയിലേറെ റിയാലാണ് നിര്‍മാണ ചിലവ്.