കാബൂള്‍: കിഴക്കന്‍ അഫ്ഗാനില്‍ യു.എസ് നടത്തിയ വ്യോമാക്രമണത്തില്‍ ഒരു കുടുംബത്തിലെ 13 അംഗങ്ങള്‍ കൊല്ലപ്പെട്ടു. 15 പേര്‍ക്കു പരുക്കേറ്റതായി ഔദ്യോഗിക വൃത്തങ്ങള്‍ അറിയിച്ചു. സംഭവവുമായി ബന്ധപ്പെട്ട് അന്വേഷണം ആരംഭിച്ചുവെന്ന് അഫ്ഗാനിലെ യു.എസ് സൈന്യം അറിയിച്ചു. കൂടാതെ കാബൂളിനടുത്തുള്ള ദഷ്ത് ബാരിയിലെ വീട്ടില്‍ ഒളിച്ചിരിക്കുകയായിരുന്ന 12 ഭീകരവാദികള്‍ മറ്റൊരാക്രമണത്തില്‍ കൊല്ലപ്പെട്ടതായി അവര്‍ പറഞ്ഞു.
സിവിലിയന്മാരുടെ വീടുകളില്‍ താലിബാന്‍ ഭീകരവാദികള്‍ ഒളിച്ചിരുന്നിടത്താണ് യു.എസ് സൈന്യം വ്യോമാക്രമണം നടത്തിയതെന്ന് ലൊഗാര്‍ പ്രവിശ്യയിലെ ഗവര്‍ണറുടെ വക്താവ് സലീം സാലഹ് മാധ്യമങ്ങളോട് പറഞ്ഞു. മരിച്ചവരില്‍ ഭൂരിഭാഗവും സ്ത്രീകളും കുട്ടികളുമാണെന്ന് അദ്ദേഹം പറഞ്ഞു. മൂന്നു ആഴ്ച മുന്‍പ് യു.എസ് നടത്തിയ വ്യോമാക്രമണത്തില്‍ 11 സിവിലയന്മാര്‍ കൊല്ലപ്പെട്ടിരുന്നു.നന്‍ങ്കന്‍ഹാര്‍ പ്രവിശ്യയ്ക്ക് സമീപമായിരുന്നു ഈ ആക്രമണം.