ദുബൈ: ഐ.സി.സിയുടെ ഏറ്റവും പുതിയ ടെസ്റ്റ് റാങ്കിങില്‍ ബാറ്റ്‌സ്മാന്‍മാരുടെ പട്ടികയില്‍ ഇന്ത്യന്‍ ക്യാപ്റ്റന്‍ വിരാട് കോഹ്‌ലിയും വിശ്വസ്ത ബാറ്റ്‌സ്മാന്‍ ചേതേശ്വര്‍ പൂജാരയും സ്ഥാനം നിലനിര്‍ത്തി. പൂജാര നാലാം സ്ഥാനത്തും കോഹ്‌ലി അഞ്ചാം സ്ഥാനത്തും തുടരുന്നു. ഇന്ത്യന്‍ ഓപണര്‍ കെ.എല്‍ രാഹുലും റാങ്കിങില്‍ നേട്ടമുണ്ടാക്കി. താരം പത്താം സ്ഥാനത്തെത്തി. ആസ്‌ത്രേലിയന്‍ നായകന്‍ സ്റ്റീവന്‍ സ്മിത്ത് ഒന്നാം സ്ഥാനത്തും ഇംഗ്ലണ്ട് നായകന്‍ ജോ റൂട്ട് രണ്ടാം സ്ഥാനത്തും ന്യൂസിലന്‍ഡ് ക്യാപ്റ്റന്‍ കെയ്ന്‍ വില്ല്യംസന്‍ മൂന്നാം സ്ഥാനത്തും നില്‍ക്കുന്നു.
ബൗളര്‍മാരുടെ പട്ടികയില്‍ ഇന്ത്യയുടെ ഇടം കൈയന്‍ സ്പിന്നര്‍ രവീന്ദ്ര ജഡേജ ഒന്നാം സ്ഥാനം നിലനിര്‍ത്തി. ആര്‍ അശ്വിന്‍ മൂന്നാം സ്ഥാനത്ത് നില്‍ക്കുന്നു. ജെയിംസ് ആന്‍ഡേഴ്‌സനാണ് ബൗളര്‍മാരുടെ പട്ടികയില്‍ രണ്ടാം സ്ഥാനത്തുള്ളത്.
ഓള്‍റൗണ്ടര്‍മാരുടെ പട്ടികയില്‍ ജഡേജ രണ്ടാം സ്ഥാനത്തും അശ്വിന്‍ മൂന്നാമതും. ബംഗ്ലാദേശ് ഓള്‍റൗണ്ടര്‍ ഷാകിബ് അല്‍ ഹസനാണ് ഒന്നാം സ്ഥാനത്തുള്ളത്. കഴിഞ്ഞ ദിവസം ഇംഗ്ലണ്ടിനെതിരായ രണ്ടാം ക്രിക്കറ്റ് ടെസ്റ്റില്‍ വെസ്റ്റിന്‍ഡീസിനെ വിജയത്തിലേക്ക് നയിച്ച ഓപണര്‍ ക്രെയ്ഗ് ബ്രാത്‌വയ്റ്റും മധ്യനിര ബാറ്റ്‌സ്മാന്‍ ഷയ് ഹോപും റാങ്കിങില്‍ കുതിച്ച് ചാട്ടം നടത്തി. ബ്രാത്‌വയ്റ്റ് 14 സ്ഥാനങ്ങള്‍ ഉയര്‍ന്ന് 16ാം റാങ്കില്‍. ഹോപ് ഒറ്റയടിക്ക് 60 സ്ഥാനങ്ങള്‍ ഉയര്‍ന്ന് 42ാം റാങ്കിലുമെത്തി.