മുംബൈ: തരംഗം സൃഷ്ടിച്ച ജിയോ ഫോണുകളുടെ ബുക്കിംഗ് 60 ലക്ഷം കവിഞ്ഞു. കഴിഞ്ഞ ഓഗസ്റ്റ് 24 നാണ് ജിയോ ഫീച്ചര്‍ ഫോണിനു ബുക്കിംഗ് തുടങ്ങിയത്. ബുക്കിംഗ് കൂടിയതിനാല്‍ 28 നു നിര്‍ത്തിവച്ചിരുന്നു. 1500 രൂപയാണ് 4 ജി ഫീച്ചര്‍ ഫോണിന്റെ വില.

സെപ്റ്റംബര്‍ 21 ന് ഫോണ്‍ പുറത്തിറക്കും. ആദ്യം ബുക്കുചെയ്തവര്‍ക്ക് ആദ്യം എന്ന രീതിയിലാണ് ഫോണ്‍ നല്‍കുക. സെപ്റ്റംബര്‍ ആദ്യവാരം തന്നെ വിതരണം ചെയ്യാന്‍ പദ്ധതിയിട്ടിരുന്നെങ്കിലും ഫോണിന്റെ ആവശ്യകത കൂടിയതിനാല്‍ തീയതി നീട്ടുകയായിരുന്നു.

500 രൂപയാണ് ബുക്കിംഗ് സമയത്ത് നല്‍കേണ്ടത്. ഫോണ്‍ ലഭിക്കുമ്പോള്‍ ബാക്കി 1000 രൂപ നല്‍കണം. 36 മാസങ്ങള്‍ക്കു ശേഷം ഫോണ്‍ തിരിച്ചുകൊടുത്താല്‍ 1500 രൂപ ഉപഭോക്താവിനു തിരിച്ചുനല്‍കുമെന്നാണ് റിലയന്‍സ് അവകാശപ്പെടുന്നത്.