തളിപ്പറമ്പ്: ആരോഗ്യമന്ത്രി കെ.കെ ശൈലജയെ കരിങ്കൊടി കാണിച്ചതിന് അഞ്ച് എം.എസ്.എഫ് പ്രവര്‍ത്തകര്‍ അറസ്റ്റില്‍. ഇന്നലെ രാത്രി ഏഴിന് തളിപ്പറമ്പ് താലൂക്കാശുപത്രി വളപ്പില്‍ കാരുണ്യ ഫാര്‍മസി ഉദ്ഘാടന ചടങ്ങിനെത്തിയതായിരുന്നു മന്ത്രി. കെട്ടിടം ഉദ്ഘാടനം ചെയ്തതിനുശേഷം മന്ത്രി വേദിയിലെത്തിയിരുന്നു.
എം.എസ്.എഫ് സംസ്ഥാന വൈസ് പ്രസിഡന്റ് ഫൈസല്‍ ചെറുകുന്നോന്‍, ജില്ലാ ജനറല്‍ സെക്രട്ടറി ഷജീര്‍ ഇഖ്ബാല്‍, ജില്ലാ വൈസ് പ്രസിഡന്റ് ജാസിര്‍ പെരുവണ, തളിപ്പറമ്പ് മണ്ഡലം പ്രസിഡന്റ് ആസിഫ് ചപ്പാരപ്പടവ്, ഉമ്മര്‍ പെരുവണ എന്നിവരെയാണ് അറസ്റ്റ് ചെയ്തു നീക്കിയത്.
സ്വാശ്രയ മെഡിക്കല്‍ പ്രവേശനത്തിലെ ഫീസ് വര്‍ധനവിനെ തുടര്‍ന്ന് സംസ്ഥാന വ്യാപകമായി നിലനില്‍ക്കുന്ന പ്രതിഷേധത്തിന്റെ ഭാഗമായാണ് എം.എസ്.എഫ് പ്രവര്‍ത്തകര്‍ മന്ത്രിയെ കരിങ്കൊടി കാണിച്ചത്.