കോഴിക്കോട്: ജില്ലാ ഭരണകൂടത്തിന്റെയും ഡി.ടി.പി.സിയുടെയും ആഭിമുഖ്യത്തില്‍ ഈ മാസം ഒന്നു മുതല്‍ അഞ്ചു വരെ നടക്കുന്ന ഓണാഘോഷത്തിന്റെ ഭാഗമായി ഭിന്നശേഷി കലാകാരന്മാരുടെ സ്‌പെഷല്‍ ഷോ നടത്തി. 
ടൗണ്‍ഹാളില്‍ നടന്ന പരിപാടി കലക്ടര്‍ യു.വി ജോസ് ഉദ്ഘാടനം ചെയ്തു. ചുറ്റിലും ആര്‍ഭാടമുള്ള ആഘോഷങ്ങള്‍ അരങ്ങു വാഴുമ്പോള്‍ ഇത്തരത്തിലുള്ള പരിപാടി പുതുമയുള്ളതാണെന്നു കലക്ടര്‍ പറഞ്ഞു. ജില്ലാ സാമൂഹിക നീതി ഓഫിസര്‍ സാറാമ്മ അധ്യക്ഷയായി. ഫ്രണ്ട്‌സ് ഓഫ് നാച്ചര്‍ ഇന്ത്യ ജില്ലാ പ്രസിഡന്റ് സൈദ് അക്ബര്‍ ബാദ്ഷാ ഖാന്‍ അവതാരകനായി. സിക്കന്തര്‍, മടവൂര്‍ സൈനുദ്ദീന്‍, കെ.ടി ശേഖര്‍ സംസാരിച്ചു. കുട്ടികളുടെ ലളിതഗാനം, കരോക്കേ, കഥാപ്രസംഗം, നൃത്തങ്ങള്‍, മാപ്പിളപ്പാട്ട്, മിമിക്രി തുടങ്ങിയവ അരങ്ങേറി. ഗവ. ചില്‍ഡ്രന്‍സ് ഹോമിലെ ഹാബില്‍ ഇഷ്‌കന്ദിറിന്റെ 'മൈ കളേഴ്‌സ് ' ചിത്രത്തിന്റെ പ്രകാശനവും പ്രദര്‍ശനവും നടന്നു. രവീന്ദ്രന്‍ പാറോല്‍ സ്വാഗതവും പരിവാര്‍ ജില്ലാ സെക്രട്ടറി തെക്കെയില്‍ രാജന്‍ നന്ദിയും പറഞ്ഞു.