തോല്‍പ്പെട്ടി: തോല്‍പ്പെട്ടി ചെക്ക് പോസ്റ്റില്‍ വാഹന പരിശോധനക്കിടയില്‍ കഞ്ചാവും ഹാഷിഷുമായി നാല് ബംഗളൂരു സ്വദേശികള്‍ പിടിയില്‍.
ബംഗളൂരു രാജാജിനഗര്‍ സുമന്ത് സന്തോഷ് കുമാര്‍ (22), ശഷാങ്ക് കെ.ബരദ്വാജ്(22), സൂരജ് ബൊപ്പണ്ണ(23), ചിരന്ത് (22), എന്നിവരാണ് പിടിയിലായത്. ഇവരില്‍ നിന്ന് 80 ഗ്രാം ഹാഷിഷും കഞ്ചാവും പിടികൂടിയിട്ടുണ്ട്. ഇവര്‍ സഞ്ചരിച്ച കാറും കസ്റ്റഡിയിലെടുത്തു.
മാനന്തവാടി എക്‌സൈസ് സി.ഐ ടി.അനില്‍കുമാറും സംഘവും നടത്തിയ വാഹനപരിശോധനക്കിടെയാണ് ഇവര്‍ പിടിയിലായത്.
കഴിഞ്ഞ 10 ദിവസത്തിനുള്ളില്‍ തോല്‍പ്പെട്ടി ചെക്ക് പോസ്റ്റില്‍ വാഹന പരിശോധനക്കിടയില്‍ 15 ലധികം പേര്‍ കഞ്ചാവ്, ബ്രൗണ്‍ഷുഗര്‍, ഹാഷിഷ് എന്നിവ കടത്തിയതുമായി ബന്ധപ്പെട്ട് പിടിയിലായിട്ടുണ്ട്. പിടിയിലായവരില്‍ ഭൂരിഭാഗം പേരും 20നും 28നും ഇടയില്‍ പ്രായമുള്ളവരാണ്. പ്രതികളെ സുല്‍ത്താന്‍ ബത്തേരി കോടതിയില്‍ ഹാജരക്കി.