വടക്കാഞ്ചേരി: നിയോജക മണ്ഡലത്തെ സമ്പൂര്‍ണ വൈദ്യുതീകരണ മണ്ഡലമാക്കുന്നതിന്റെ ഭാഗമായി നിയോജക മണ്ഡലത്തിലെ മുഴുവന്‍ പഞ്ചായത്തുകളിലും, വടക്കാഞ്ചേരി നഗരസഭയിലും ഈ മാസം 18 ന് സ്‌പെഷ്യല്‍ ഗ്രാമസഭകള്‍ വിളിച്ച് ചേര്‍ക്കാന്‍ അനില്‍ അക്കര എം.എല്‍.എ യുടെ അധ്യക്ഷതയില്‍ ചേര്‍ന്ന ഉന്നതതല യോഗം തീരുമാനമെടുത്തു. ഉച്ചതിരിഞ്ഞ് മൂന്നിനാണ് ഗ്രാമസഭകള്‍. ഇനിയും വൈദ്യുതി ലഭിച്ചിട്ടില്ലാത്ത ഗുണഭോക്താക്കളില്‍ നിന്ന് സെപ്റ്റംബര്‍ എട്ടിനകം അപേക്ഷകള്‍ സ്വീകരിച്ച് ഒന്‍പതിന് കരട് പട്ടിക പ്രസിദ്ധീകരിക്കാനും തീരുമാനമെടുത്തു.  കെട്ടിട നമ്പറുകള്‍ ലഭിക്കാത്ത വീടുകള്‍ക്ക് തദ്ദേശ സ്വയം ഭരണ സ്ഥാപനത്തിന്റെ നിര്‍ദ്ദേശമനുസരിച്ച് വൈദ്യുതി കണക്ഷന്‍ നല്‍കാന്‍ വൈദ്യുതി വകുപ്പ് അധികൃതര്‍ക്ക് അനില്‍ അക്കര നിര്‍ദ്ദേശം നല്‍കി. യോഗത്തില്‍ നഗരസഭ ചെയര്‍പേഴ്‌സണ്‍ ശിവപ്രിയ സന്തോഷ് അധ്യക്ഷയായി. ജില്ലാ പഞ്ചായത്ത് മെമ്പര്‍മാരായ മേരി തോമാസ്, സുരേഷ് ബാബു, പുഴയ്ക്കല്‍ ബ്ലോക്ക് പഞ്ചായത്ത് പ്രസിഡന്റ് ലൈജു.സി.എടക്കളത്തൂര്‍, സ്ഥിരം സമിതി അധ്യക്ഷന്മാരായ സി.വി കുരിയാക്കോസ്, ടി.ജയലക്ഷ്മി, പഞ്ചായത്ത് പ്രസിഡന്റുമാരായ എ.ജെ ഷാജു, രാധ രവീന്ദ്രന്‍, വിജയ ബാബു, വൈദ്യുതി വകുപ്പ് എക്‌സിക്യൂട്ടീവ് എന്‍ജിനിയര്‍ എ.കെ രവീന്ദ്രന്‍, അസിസ്റ്റന്റ് എന്‍ജിനിയര്‍മാരായ വി.എ മനോജ്, എന്‍.വി സുനില്‍, പഞ്ചായത്ത് മെമ്പര്‍മാര്‍ തുടങ്ങിയവര്‍ യോഗത്തില്‍ പങ്കെടുത്തു.