കാസര്‍കോട്: വീട്ടുമുറ്റത്ത് കളിച്ചുകൊണ്ടിരിക്കേ കാണാതായ കുട്ടിയുടെ മൃതദേഹം പുഴയില്‍ നിന്നും കണ്ടെത്തി.ചെങ്കള ചേരുരിലെ കബീര്‍-റുഖ്‌സാന എന്നിവരുടെ മകന്‍ രണ്ടര വയസുകാരനായ ശഅബാന്റെ മൃതദേഹമാണ് ഇന്നുച്ചയോടെ തളങ്കര കെ.കെ പുറത്തെ പുഴയില്‍ നിന്ന് കണ്ടെത്തിയത്.

ഇന്നലെ ഉച്ചക്ക് 2.30ഓടെയാണ് ശഅബാനെ പുഴക്ക് സമീപത്തുള്ള ചേരുരിലെ വീട്ടുമുറ്റത്ത് നിന്നും കളിച്ചുകൊണ്ടിരിക്കേ കാണാതായത്. കുട്ടിയെ പൊടുന്നനെ കാണാതായതിനെ തുടര്‍ന്ന് വീട്ടുകാര്‍ അയല്‍പക്കത്തും മറ്റും അന്വേഷിച്ചെങ്കിലും കണ്ടെത്താനായില്ല.

തുടര്‍ന്ന് വിദ്യാനഗര്‍ പൊലിസില്‍ വിവരം അറിയിക്കുകയായിരുന്നു. ഇതേ തുടര്‍ന്ന് പൊലിസ്,അഗ്‌നിശമന സേന, പ്രദേശ വാസികള്‍ ഉള്‍പ്പെടെ ഇന്നലെ രാത്രി വരെ പുഴയില്‍ തിരച്ചില്‍ നടത്തിയെങ്കിലും കുട്ടിയെ കണ്ടെത്താന്‍ കഴിഞ്ഞില്ല. തുടര്‍ന്ന് ഇന്ന് രാവിലെ മുതല്‍ വീണ്ടും തെരച്ചില്‍ നടത്തി വരുകയായിരുന്നു. ഇതിനിടയിലാണ് ചന്ദ്രഗിരിപ്പുഴയിലെ തളങ്കര കെ.കെ പുറം ഭാഗത്ത് കുട്ടിയുടെ മൃതദേഹം കണ്ടെത്തിയത്.

കുട്ടിയെ ആരെങ്കിലും തട്ടികൊണ്ട് പോയതാണെ സംശയം ഉടലെടുത്തതിനെ തുടര്‍ന്ന് ഈ നിലയിലും പൊലിസ് അന്വേഷണം നടത്തി വന്നിരുന്നു. കഴിഞ്ഞ മാസം ചേരുരിലെ ഭര്‍തൃമതിയായ യുവതി പുഴയില്‍ വീണ് മരിച്ചതിന്റെ ദുഖ:ത്തില്‍ നിന്നും പ്രദേശം മോചിതമാകുന്നതിന് മുമ്പാണ് ശഅബാനും പുഴയില്‍ വീണ് മരിച്ചത്.