ഉഡുപ്പി (കര്‍ണാടക): ബസിന് പിറകില്‍ കാറിടിച്ച് കാസര്‍കോട് ഉപ്പള സ്വദേശിയായ യുവാവ് മരിച്ചു. ഉപ്പള പത്വാടി അര്‍ഷിമാര്‍ ഹൗസില്‍ മഹ് മൂദിന്റെ മകനും ഉപ്പളയിലെ വസ്ത്രക്കടയിലെ ജീവനക്കാരനുമായിരുന്ന മിച്ചു എന്ന മുഹമ്മദ് മിര്‍ഷാദ് (20) ആണ് മരിച്ചത്.

സംഭവത്തില്‍ പരുക്കേറ്റ മിര്‍ഷാദിന്റെ സുഹൃത്ത് നൗഫലിനെ ഗുരുതരാവസ്ഥയില്‍ ആശുപത്രിയില്‍ പ്രവേശിപ്പിച്ചിരിക്കുകയാണ്. ഇതിനു പുറമേ കാറിലുണ്ടായിരുന്ന മുഹമ്മദ് ഇര്‍ഷാദ് (21), അര്‍ബാസ് (21), ഫവാസ് (21), സക്കീര്‍ (20), മണ്ണംകുഴിയിലെ അര്‍ഫാസ് (20) എന്നിവര്‍ക്കും പരുക്കേറ്റിട്ടുണ്ട്.

ഇന്നലെ രാവിലെ ഉടുപ്പിക്കടുത്ത ഉദ്യാവറിലെ ദേശീയപാതയിലാണ് അപകടം. ഉഡുപ്പിയില്‍ നിന്നും കാപ്പുവിലേക്കു പോവുകയായിരുന്ന സ്വകാര്യ ബസിനു പിറകില്‍ മിര്‍ഷാദ് ഉള്‍പ്പെടെയുള്ളവര്‍ സഞ്ചരിച്ച ഇന്നോവ കാര്‍ ഇടിക്കുകയായിരുന്നു.

യാത്രക്കാരെ കയറ്റാനായി ബസ് കാത്തിരിപ്പ് കേന്ദ്രത്തില്‍ നിര്‍ത്താനൊരുങ്ങിയപ്പോഴാണ് ഇവരുടെ കാര്‍ ബസിന് പിറകിലിടിച്ചത്. അപകടത്തില്‍ കാറിന്റെ മുന്‍വശം പൂര്‍ണമായും തകര്‍ന്നു. ഗുരുതരമായി പരുക്കേറ്റ മിര്‍ഷാദിനെ ഉടന്‍ ആശുപത്രിയിലെത്തിച്ചെങ്കിലും മരണപ്പെട്ടിരുന്നു.