സുല്‍ത്താന്‍ ബത്തേരി: ആളില്ലാത്ത വീട്ടില്‍ കയറി സ്വര്‍ണാഭരണവും ലാപ്‌ടോപും വാച്ചും കവര്‍ന്ന കേസില്‍ രണ്ടുപേര്‍ പിടിയില്‍.
പുല്‍പള്ളി പാക്കം തിരുമുഖത്തെ സുരേഷ്(24), കേണിച്ചിറ പത്തില്‍പീടികയിലെ തറപ്പേല്‍ രജീഷ് (27)എന്നിവരെയാണ് സുല്‍ത്താന്‍ ബത്തേരി പൊലിസ് അറസ്റ്റ് ചെയ്തത്.
ഇക്കഴിഞ്ഞ തിങ്കളാഴ്ച രാത്രി അരിവയലിലെ പുത്തന്‍വീട്ടില്‍ നസീമിന്റെ വീട്ടിലാണ് മോഷണം നടന്നത്. വീടിന്റെ മുകള്‍ നിലയിലെ ബാത്ത് റൂമിന്റെ വെന്റിലേറ്ററിലെ കമ്പിവളച്ചാണ് പ്രതികള്‍ വീട്ടിനകത്ത് കടന്നത്.
രാത്രി വീടിന് സമീപം രണ്ട് യുവാക്കള്‍ ചുറ്റിത്തിരിയുന്നത് കണ്ട് സംശയം തോന്നിയ സമീപവാസികളായ ബന്ധുക്കള്‍ വീട്ടിലെത്തി നോക്കിയപ്പോള്‍ പുറകുവശത്തെ വാതില്‍ തുറന്ന് കിടക്കുന്നതാണ് കണ്ടത്. ഈ സമയം തന്നെ നസീമും കുടുംബവും തിരിച്ചെത്തി.
തുടര്‍ന്ന് നടത്തിയ പരിശോധനയില്‍ രണ്ട് യുവാക്കള്‍ ഓടി രക്ഷപെടുന്നത് കാണുകയായിരുന്നു.
ഇതു സംബന്ധിച്ച് ഉടന്‍ തന്നെ പൊലിസില്‍ അറിയിക്കുകയായിരുന്നു. വീട്ടുകാര്‍ നല്‍കിയ വിവരങ്ങളുടെ അടിസ്ഥാനത്തില്‍ പട്രോളിങ് നടത്തുന്ന പൊലിസുകാര്‍ രാത്രി 11.30ഓടെ ഒന്നാം പ്രതി സുരേഷിനെ മന്ദംകൊല്ലിയിലെ ബീവറേജസ് ഔട്ട് ലെറ്റിന് സമീപത്തു നിന്ന് പിടികൂടി.
ഇയാളില്‍ നിന്നും മോഷണം പോയ സ്വര്‍ണാഭരണങ്ങള്‍ കണ്ടെടുത്തു.
രണ്ടാം പ്രതി രജീഷിനെ രാത്രി വീട്ടില്‍ നിന്നാണ് പൊലിസ് പിടികൂടിയത്. ഇയാളുടെ വീട്ടിലെ കാറില്‍ നിന്നും ലാപ്‌ടോപ്പും കണ്ടെടുത്തു.