കണ്ണൂര്‍: ഓണം ആഘോഷിക്കാന്‍ പയ്യാമ്പലത്ത് എത്തിയ വിദ്യാര്‍ഥികള്‍ തിരയില്‍പെട്ടു. ഒരാളെ കാണാതായി. തോട്ടട അജയ് നിവാസിലെ മനോജിന്റെ മകന്‍ അഖിലിനെ(11)യാണ് കാണാതായത്. തിരുവോണ ദിനത്തില്‍ ഉച്ചയ്ക്ക് രണ്ടരയോടെ പയ്യാമ്പലത്ത് കടലില്‍ കുളിക്കുന്നതിനിടെ തിരയില്‍പെടുകയായിരുന്നു. കടലില്‍ ഇറങ്ങിയവരെ ലൈഫ് ഗാര്‍ഡ് വിലക്കിയിരുന്നു. ഇവര്‍ പിന്മാറിയിരുന്നില്ല. അഖിലിനൊപ്പം സഹോദരന്‍ നിഖില്‍, കൂട്ടുകാരായ വസന്ത്, സച്ചിന്‍, നിതീഷ്, സുമേഷ് എന്നിവരാണുണ്ടായിരുന്നത്. നാലുപേരെ ലൈഫ് ഗാര്‍ഡ് രക്ഷപ്പെടുത്തി ജില്ലാ ആശുപത്രിയിലെത്തിച്ചു. അഖില്‍ കടലില്‍ അകപ്പെട്ടത് പിന്നീതാണ് അറിയുന്നത്. തുടര്‍ന്ന് മുങ്ങല്‍ വിദഗ്ധരും തീരദേശ പൊലിസും മറൈന്‍ എന്‍ഫോസ്‌മെന്റും അഖിലിനെ കണ്ടെത്താന്‍ തിരച്ചില്‍ നടത്തിയെങ്കിലും വിഫലമായി. അഖിലിനായി ഇന്നലെയും സംഘം തിരച്ചില്‍ നടത്തി. തോട്ടട വെസ്റ്റ് യു.പി സ്‌കൂളില്‍ ആറാംക്ലാസ് വിദ്യാര്‍ഥിയാണ് അഖില്‍.