ഉരുവച്ചാല്‍: നെല്ലൂന്നിയില്‍ സി.പി.എം പ്രവര്‍ത്തകന് വെട്ടേറ്റു. നെല്ലൂന്നിയിലെ വിശാലയില്‍ പി. ജിജീഷി(30)നെ കണ്ണൂര്‍ എ.കെ.ജി ആശുപത്രിയില്‍ പ്രവേശിപ്പിച്ചു. കഴിഞ്ഞദിവസം രാത്രി നെല്ലൂന്നിയില്‍ നിന്ന് വീട്ടിലേക്ക് നടന്നുപോകവെ കാറിലെത്തിയ സംഘമാണ് ജിജീഷിനെ വെട്ടിപരുക്കേല്‍പ്പിച്ചതെന്ന് പറയുന്നു. വലതുകൈക്കാണ് വെട്ടേറ്റത്. സംഭവത്തിന് ശേഷം നെല്ലൂന്നിയിലെ ആര്‍.എസ്.എസ് സേവാ കേന്ദ്രത്തിനും ബസ് വെയിറ്റിങ് ഷെല്‍ട്ടറിനും നേരേ അക്രമമുണ്ടായി. സേവാകേന്ദ്രത്തിലെ ഫര്‍ണിച്ചറുകള്‍ തകര്‍ത്തു. പി.കെ ചന്തുക്കുട്ടിയുടെ സ്മരണക്കായി നിര്‍മിച്ച ബസ് ഷെല്‍ട്ടറാണ് തകര്‍ത്തത്. ശ്രീകൃഷ്ണ ജയന്തിയുടെ ഭാഗമായി കെട്ടിയ ഫഌക്‌സ് ബോര്‍ഡുകളും കൊടിതോരണങ്ങളും നശിപ്പിച്ചതായും പരാതിയുണ്ട്. കഴിഞ്ഞദിവസം വ്യാപാരിയായ അബ്ദുല്‍ ഖാദറിന്റെ വീട്ടുവരാന്തയില്‍ റീത്ത് വച്ച സംഭവവും ഉണ്ടായിരുന്നു. സംഘര്‍ഷാവസ്ഥ കണക്കിലെടുത്ത് മട്ടന്നൂര്‍ എസ്.ഐ രാജീവന്റെ നേതൃത്വത്തില്‍ പൊലിസ് പട്രോളിങ് ശക്തമാക്കി.