കൊട്ടാരക്കര: തിരുവോണ ദിവസം എക്‌സൈസ് സംഘം നടത്തിയ റെയ്ഡില്‍ ചാരായവും വാറ്റുപകരണങ്ങളും പിടിച്ചെടുത്തു. ഒരാളെ അറസ്റ്റ് ചെയ്തു.
കുളക്കട ഇരുവേലിക്കല്‍ പുലികുളത്ത് വീട്ടില്‍ മണിക്കുട്ടന്‍ എന്ന് വിളിക്കുന്ന കൃഷ്ണന്‍ കുട്ടി (37) നെയാണ് എക്‌സൈസ് സംഘം അറസ്റ്റ് ചെയ്തത്. ഇയാളുടെ കയ്യില്‍ നിന്നും 4 ലിറ്റര്‍ വാറ്റ് ചാരായവും, വാറ്റ് ഉപകരണങ്ങളും പിടിച്ചെടുത്തിട്ടുണ്ട്. ഒരു മാസക്കാലമായി ഇയാള്‍ എക്‌സൈസ് സംഘത്തിന്റെ നിരീക്ഷണത്തിലായിരുന്നു.
തിരുവോണം നാളിലെ ആഘോഷത്തിന് വേണ്ടി ആവശ്യക്കാരില്‍ നിന്ന് മുന്‍കൂര്‍ പണം പറ്റി പ്രത്യേകം തയ്യാര്‍ ചെയ്തു വില്‍ക്കുന്ന ചാരായത്തേ മാവേലി ചാരായം എന്നാണ് അറിയപ്പെട്ടിരുന്നത്.കല്യാണം, വീട് പാലുകാച്ചല്‍, വീട് വാര്‍പ്പ് തുടങ്ങിയ വിശേഷ ദിവസങ്ങളില്‍ ഇയാളുടെ ചാരായത്തിന് ആവശ്യക്കാര്‍ ഏറെയാണ്. എക്‌സൈസിന് കിട്ടിയ രഹസ്യ വിവരത്തിന്റെ അടിസ്ഥാനത്തില്‍ കുളക്കട ഇ രുവേലിക്കല്‍ പാലത്തിന്റെ അടിഭാഗത്ത് നിന്നുമാണ് ഇയാളെ അറസ്റ്റ് ചെയ്തത്. കൊട്ടാരക്കര എക്‌സൈസ് സി.ഐ വി. റോബര്‍ട്ട്, പ്രിവന്റീവ് ഓഫീസര്‍ പ്രേം നസീര്‍, സിവില്‍ എക്‌സൈസ് ഓഫിസര്‍മാരായ ബാബു, സജി ജോണ്‍, അനീഷ് എന്നിവര്‍ റെയ്ഡില്‍ പങ്കെടുത്തു.