മക്കാവു: എ.എഫ്.സി ഏഷ്യന്‍ കപ്പ് യോഗ്യതാ പോരാട്ടത്തില്‍ ഇന്ത്യക്ക് തകര്‍പ്പന്‍ ജയം. മക്കാവുവിനെതിരായ മത്സരത്തില്‍ ഇന്ത്യ മറുപടിയില്ലാത്ത രണ്ട് ഗോളുകള്‍ക്ക് വിജയം സ്വന്തമാക്കി. യോഗ്യതാ പോരാട്ടത്തില്‍ ഇന്ത്യ സ്വന്തമാക്കുന്ന തുടര്‍ച്ചയായ മൂന്നാം വിജയമാണിത്. പരാജയമറിയാതെ 11 അന്താരാഷ്ട്ര മത്സരങ്ങള്‍ പൂര്‍ത്തിയാക്കി ഇന്ത്യ കുതിപ്പ് തുടരുന്നു.
പകരക്കാരനായി ഇറങ്ങിയ ബല്‍വന്ത് സിങ് രണ്ടാം പകുതിയില്‍ നേടിയ ഇരട്ട ഗോളുകളാണ് ഇന്ത്യക്ക് വിജയം സമ്മാനിച്ചത്. 96ാം റാങ്കിലുള്ള ഇന്ത്യ 183ാം റാങ്കിലുള്ള മക്കാവുവിനെ നേരിടാനിറങ്ങുമ്പോള്‍ കടലാസിലെ സാധ്യത ഇന്ത്യക്ക് തന്നെയായിരുന്നു. അത് കളത്തിലും നടപ്പില്‍ വരുത്തിയാണ് ഇന്ത്യയുടെ വിജയം. സ്വന്തം തട്ടകത്തില്‍ അരങ്ങേറിയ മത്സരത്തില്‍ മക്കാവു ആദ്യ പകുതിയില്‍ കടുത്ത പ്രതിരോധമാണ് പുറത്തെടുത്തത്. അതോടെ ആദ്യ പകുതി ഗോള്‍രഹിതമായി.
രണ്ടാം പകുതി തുടങ്ങി യൂജിന്‍സെന്‍ ലിങ്‌ദോയ്ക്ക് പകരമാണ് ബല്‍വന്ത് കളത്തിലെത്തിയത്. അതിന് ഫലവും ലഭിച്ചു. 57, 82 മിനുട്ടുകളിലാണ് ബല്‍ന്ത് വല ചലിപ്പിച്ചത്. 57ാം മിനുട്ടില്‍ നരായന്‍ ദാസ് നല്‍കിയ പാസില്‍ നിന്ന് ഹെഡ്ഡറിലൂടെയാണ് ബല്‍വന്ത് വല കുലുക്കി ഇന്ത്യക്ക് ലീഡ് സമ്മാനിച്ചു. രണ്ടാം ഗോള്‍ മക്കാവു പ്രതിരോധ താരങ്ങളുടെ പിഴവ് മുതലെടുത്താണ് ബല്‍വന്ത് വലയിലാക്കിയത്. മുന്നേറ്റത്തിലെ ഇന്ത്യയുടെ ശക്തി കേന്ദ്രങ്ങളായ സുനില്‍ ഛേത്രി, ജെജ ലാല്‍പെഖുലെ എന്നിവരെ ആതിഥേയ ടീം സമര്‍ഥമായി പൂട്ടിയതോടെ ആദ്യ പകുതിയില്‍ ഇന്ത്യന്‍ മുന്നേറ്റങ്ങള്‍ വിഫലമായി.
മൂന്ന് മത്സരങ്ങള്‍ പൂര്‍ത്തിയായപ്പോള്‍ ഇന്ത്യ ഒന്‍പത് പോയിന്റുമായി ഗ്രൂപ്പില്‍ ഒന്നാമത്. എ.എഫ്.സി ഏഷ്യാ കപ്പ് യോഗ്യതയ്ക്കുള്ള സാധ്യതകള്‍ കൂടുതല്‍ സജീവമാക്കാനും വിജയത്തോടെ ഇന്ത്യക്ക് സാധിച്ചു.