എടക്കര: വഴിക്കടവ് ചെക്ക് പോസ്റ്റ് വഴി നികുതി വെട്ടിച്ച് കടത്തുകയായിരുന്ന ജാക്കിയും ഹാമറും ഉള്‍പ്പെടെ വാഹനത്തിന്റെ വിവിധ പാര്‍ട്‌സ് വഴിക്കടവ് എക്‌സൈസ് ചെക്ക് പോസ്റ്റില്‍ പിടികൂടി. തമിഴ്‌നാട്ടിലെ ദാരാപുരത്തു നിന്നും ജീപ്പില്‍ കൊണ്ടുവരികയായിരുന്ന സാധനങ്ങള്‍ക്ക് ബില്ലും മറ്റ് അനുബന്ധ രേഖകളും ഇല്ലായിരുന്നു. ജാക്കിയും ഹാമറും കൂടി ഏതാണ്ട് നാനൂറോളം പാര്‍ട്‌സ് ഉണ്ട്.
മണ്ണ് മാന്തിയന്ത്രം, കമ്പ്രസര്‍ എന്നിവയുടെ ഭാഗങ്ങളാണ് മറ്റു സാധനങ്ങള്‍, രാവിലെ പത്തോടെയാണ് സംഭവം. ആനമറിയിലെ വാണിജ്യനികുതി ചെക്ക് പോസ്റ്റില്‍ പരിശോധന ഇല്ലാതെ കടന്നു വന്നതാണ് വാഹനം. എക്‌സൈസ് ഇന്‍സ്‌പെക്ടര്‍ വി.സുരേഷ് ബാബുവിന്റെ നേതൃത്വത്തിലുള്ള സംഘമാണ് പിടികൂടിയത്. മദ്യം, മയക്കുമരുന്ന് കത്ത് തടയുന്നതിനായി എക്‌സൈസ് ചെക്ക് പോസ്റ്റില്‍ പരിശോധന കര്‍ശനമാക്കിയതോടെ നികുതി വെട്ടിച്ച് കടത്തുന്ന സാധനങ്ങള്‍ ഇവിടെ പിടികൂടുകയായിരുന്നു.

കഴിഞ്ഞ ദിവസം പത്തുലക്ഷം രൂപയുടെ ബീഡിയും നിരോധിത മയക്കുമരുന്ന് ഉത്പന്നങ്ങളും പിടികൂടിയിരുന്നു.