കൊല്ലം: നടന്‍ ദിലീപിനെ പിന്തുണച്ച് കെ.ബി ഗണേശ് കുമാര്‍ എം.എല്‍.എ നടത്തിയ പ്രസ്താവനക്കെതിരേ സി.പിഎമ്മിനുള്ളില്‍ അമര്‍ഷം പുകയുന്നു. നേരത്തേ കൊല്ലം എം.എല്‍.എയും നടനുമായ മുകേഷ് മാധ്യമങ്ങള്‍ക്കെതിരേ നടത്തിയ പരാമര്‍ശം സൃഷ്ടിച്ച വിവാദം കെട്ടടങ്ങിയതിന് പിന്നാലെയാണ് ഗണേശിന്റെ പ്രസ്താവന. 

ദിലീപിനെ പിന്തുണയ്ക്കാന്‍ അദ്ദേഹത്തിന്റെ ഔദാര്യം വാങ്ങിയവര്‍ മുന്നോട്ടുവരണമെന്നും കേസുകള്‍ മുഖ്യമന്ത്രി പുനഃപരിശോധിക്കണമെന്നുമായിരുന്നു ഗണേശ് പറഞ്ഞത്. ഇടതുമുന്നണി എം.എല്‍.എ തന്നെ പ്രതിക്ക് അനുകൂലമായി രംഗത്തുവന്നത് മുന്നണിയുടെ പ്രതിച്ഛായയെ ബാധിച്ചതായാണ് സി.പി.എമ്മിനുള്ളിലെ ഒരുവിഭാഗം അഭിപ്രായപ്പെടുന്നത്.
വിവാദ പരാമര്‍ശത്തിന്റെ പേരില്‍ മുകേഷിന് സി.പി.എം താക്കീതു നല്‍കിയിരുന്നു. എന്നാല്‍, കേരളാ കോണ്‍ഗ്രസ് (ബി) ഘടകകക്ഷി അല്ലാത്തതിനാല്‍ അവരോട് വിശദീകരണം ചോദിക്കാന്‍ കഴിയാത്ത അവസ്ഥയിലാണ് സി.പി.എം നേതൃത്വം.
കേരളാ കോണ്‍ഗ്രസ് (ബി)യെ ഇടതുമുന്നണിയുമായി സഹകരിപ്പിക്കുന്നതില്‍ എതിര്‍പ്പുള്ള വലിയൊരുവിഭാഗം നേതാക്കളും പ്രവര്‍ത്തകരും പാര്‍ട്ടിയിലുണ്ട്.
യു.ഡി.എഫിലായിരുന്ന കാലത്ത് മുന്നണിക്ക് തലവേദന സൃഷ്ടിച്ചിരുന്ന ബാലകൃഷ്ണ പിള്ളയും മകനും ഒടുവില്‍ കോണ്‍ഗ്രസുമായി തെറ്റിയാണ് ഇടതുമുന്നണിയില്‍ അഭയംതേടിയത്.
പത്തനാപുരത്ത് നടന്ന എന്‍.എസ്.എസ് യോഗത്തില്‍ വാങ്ക് വിളിയെ സംബന്ധിച്ച് പിള്ള നടത്തിയ പരാമര്‍ശം ഏറെ വിവാദങ്ങള്‍ക്ക് കാരണമായിരുന്നു.
ഇത് ഇടതുമുന്നണിയെ കുറച്ചൊന്നുമല്ല അന്ന് പ്രതിരോധത്തിലാക്കിയത്. ഇടതുമുന്നണിയില്‍ സി.പി.എം മത്സരിച്ചിരുന്ന സീറ്റ് ഗണേശ് കുമാറിന് വിട്ടുനല്‍കുകയായിരുന്നു.
നടന്‍ ജഗദീഷായിരുന്നു യു.ഡി.എഫ് സ്ഥാനാര്‍ഥി. ഗണേശ് കുമാറിന് സീറ്റ് നല്‍കിയത് കൊല്ലം ജില്ലയുടെ കിഴക്കന്‍ മേഖലയില്‍ സി.പി.എമ്മിനുള്ളില്‍ വിവാദങ്ങള്‍ക്ക് ഇടവരുത്തിയിരുന്നു.
എന്‍.എസ്.എസ് വോട്ട് ലക്ഷ്യംവച്ചായിരുന്നു സി.പി.എം കേരളാ കോണ്‍ഗ്രസ് ബിയെ മുന്നണിയുമായി സഹകരിപ്പിച്ചതും പിള്ളക്ക് മുന്നോക്ക കോര്‍പറേഷന്‍ ചെയര്‍മാന്‍ സ്ഥാനം നല്‍കിയതും.