ഭുവനേശ്വര്‍: ഒഡിഷയില്‍ അടുത്ത നിയമസഭാ തെരഞ്ഞെടുപ്പില്‍ ബി.ജെ.പി ഒറ്റയ്ക്ക് മത്സരിക്കുമെന്ന് അമിത്ഷാ. മറ്റൊരു പാര്‍ട്ടിയുമായും കൂട്ടുകെട്ട് ഉണ്ടാവില്ലെന്നും അമിത്ഷാ പറഞ്ഞു. ഒഡിഷ തെരഞ്ഞെടുപ്പില്‍ ബി.ജെ.പി തന്നെ വിജയിക്കുമെന്ന് മന്ത്രി ധര്‍മേന്ദ്ര പ്രധാന്‍ ആവര്‍ത്തിച്ചു. ജനങ്ങള്‍ക്ക് ഒഡിഷ സര്‍ക്കാരിലുള്ള വിശ്വാസം നഷ്ടപ്പെട്ടിരിക്കുന്നു. അതുകൊണ്ടുതന്നെ അവിടെ ബി.ജെ.പി അധികാരത്തിലേറുമെന്ന കാര്യത്തില്‍ ഒരു സംശയവുമില്ലെന്നും പ്രധാന്‍ പറഞ്ഞു. അതേസമയം അമിത്ഷായുടെ കണക്കുകൂട്ടലില്‍ തനിക്ക് അത്ഭുതമാണ് തോന്നുന്നതെന്ന് മുഖ്യമന്ത്രിയും ബി.ജെ.ഡി അധ്യക്ഷനുമായ നവീന്‍ പട്‌നായിക്ക് വ്യക്തമാക്കി. ബി.ജെ.പി ഒറ്റക്കുമത്സരിക്കുകയെന്നത് അവരുടെ ഇഷ്ടമാണ്. എന്നാല്‍ ജയിക്കണമോ എന്നത് ജനങ്ങള്‍ തീരുമാനിക്കുമെന്നും അദ്ദേഹം പരിഹസിച്ചു.