ന്യൂഡല്‍ഹി: ഡല്‍ഹി ജവഹര്‍ലാല്‍ നെഹ്‌റു സര്‍വകലാശാലയിലെ വിദ്യാര്‍ഥി യൂനിയന്‍ തെരഞ്ഞെടുപ്പ് ഇന്ന്.
രാജ്യത്ത് ശക്തിപ്പെട്ട അതി തീവ്ര ദേശീയവാദത്തിനെതിരേ എതിര്‍ശബ്ദം ഉയര്‍ന്നുവന്ന കാംപസിലെ വിദ്യാര്‍ഥി യൂനിയന്‍ തെരഞ്ഞെടുപ്പുഫലം ദേശീയരാഷ്ട്രീയത്തിലും ശ്രദ്ധേയമാണ്.
ഇടത് സഖ്യവും ബിര്‍സ അംബേദ്കര്‍ ഫൂലെ സ്റ്റുഡന്റ്‌സ് അസോസിയേഷനും തമ്മിലാണ് പ്രധാന മത്സരം. ഇതിനു പുറമെ എന്‍.എസ്.യു.ഐ, എ.ബി.വി.പി സംഘടനകളും മത്സരരംഗത്തുണ്ട്. തിങ്കളാഴ്ചയാണ് ഫലപ്രഖ്യാപനം.
പ്രസിഡന്റ് സ്ഥാനത്തേക്ക് മത്സരിക്കുന്ന ഏഴില്‍ അഞ്ചും പെണ്‍കുട്ടികളാണ്. ഇടതുസഖ്യത്തില്‍ നിന്നും മാറി ഒറ്റക്ക് മത്സരിക്കുന്ന സി.പി.ഐയുടെ വിദ്യാര്‍ഥി സംഘടനയായ എ.ഐ.എസ്.എഫിന്റെ പ്രസിഡന്റ് സ്ഥാനാര്‍ഥി അപരാജിതാ രാജ സ്ഥാനാര്‍ഥികളിലെ ഏക മലയാളി സാന്നിധ്യമാണ്. സി.പി.ഐ നേതാവ് ഡി. രാജയുടെ മകളാണ് അപരാജിത.