മലപ്പുറം: ജില്ലയിലെ സര്‍ക്കാര്‍-എയ്ഡഡ് ഹൈസ്‌കൂളുകളിലെ 6,400 'ഹായ് സ്‌കൂള്‍ കുട്ടിക്കൂട്ടം' അംഗങ്ങളെ ഉള്‍പ്പെടുത്തി നടത്തുന്ന ഇ-അറ്റ് ഉത്സവ് ദ്വിദിന ക്യാംപിന്റെ ഒന്നാം ഘട്ടം പൂര്‍ത്തിയായി. വിദ്യാഭ്യാസ വകുപ്പിനു കീഴിലുള്ള കേരളാ ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എജ്യൂക്കേഷനാണ് ആനിമേഷന്‍, ഇലക്ട്രോണിക്‌സ്, ഹാര്‍ഡ്‌വെയര്‍, സൈബര്‍ സുരക്ഷ, മലയാളം കംപ്യൂട്ടിങ് എന്നിങ്ങനെ അഞ്ചു മേഖലകളില്‍ വിദഗ്ധ പരിശീലനം ഉള്‍പ്പെടുന്ന ക്യാംപ് സംഘടിപ്പിക്കുന്നത്. സ്‌കൂളുകളില്‍ നിലവിലുണ്ടായിരുന്ന ഐ.ടി ക്ലബിനെ സ്റ്റുഡന്റ്‌സ് പൊലിസ് കേഡറ്റ് മാതൃകയില്‍ പരിഷ്‌കരിച്ച് കുട്ടികള്‍ക്കു തുടര്‍ച്ചയായി പരിശീലനം നല്‍കുകയും അതാത് മേഖലകളിലെ പ്രവര്‍ത്തനങ്ങള്‍ രൂപപ്പെടുത്തുകയും ചെയ്യുന്നതരത്തില്‍ സംസ്ഥാനതലത്തില്‍ ഒരു ലക്ഷത്തോളം കുട്ടികളെ ഉള്‍പ്പെടുത്തി 'ഹായ് സ്‌കൂള്‍ കുട്ടിക്കൂട്ടം' 2017 ജനുവരിയിലാണ് രൂപം കൊള്ളുന്നത്.