നിലമ്പൂര്‍: അനധികൃതമായി വിദേശമദ്യം കടത്തുകയായിരുന്ന ഓട്ടോറിക്ഷ രോഗിയുമായി വരികയായിരുന്ന കാറുമായി കൂട്ടിയിടിച്ച് അപകടത്തില്‍പ്പെട്ടു. ഓട്ടോയില്‍നിന്നു 33 കുപ്പി വിദേശമദ്യം കണ്ടെടുത്തു. ഇന്നലെ രാവിലെ പതിനൊന്നോടെ നിലമ്പൂര്‍ നഗരസഭയ്ക്കു മുന്നിലാണ് ഓട്ടോയും കാറും കൂട്ടിയിടിച്ചത്.
ഓട്ടോറിക്ഷ തിരിക്കുന്നതിനിടയില്‍ ജില്ലാ ആശുപത്രിയിലേക്കു വരുന്ന കാറില്‍ ഇടിക്കുകയായിരുന്നു. ഓട്ടോ ഡ്രൈവറെ നാട്ടുകാര്‍ ഉടന്‍ ജില്ലാ ആശുപത്രിയില്‍ എത്തിച്ചെങ്കിലും പൊലിസെത്തും മുന്‍പ് ഇയാള്‍ ആശുപത്രിയില്‍നിന്നു മുങ്ങി. ഹനീഫ എന്നാണ് ആശുപത്രിയില്‍ പേര് നല്‍കിയിട്ടുള്ളത്. വഴിക്കടവ് മുണ്ട സ്വദേശിയായ ഇയാളെ പ്രതിയാക്കി പൊലിസ് കേസെടുത്തു. ഓട്ടോ പരിശോധിച്ചപ്പോഴാണ് ബിവറേജസ് ഔട്ട്‌ലറ്റില്‍നിന്നു വാങ്ങിയ 500 മില്ലിയുടെ 33 കുപ്പികള്‍ കണ്ടെത്തിയത്. മദ്യം കടത്താനുപയോഗിച്ച ഓട്ടോയും കസ്റ്റഡിയിലെടുത്തു.
ബിവറേജസിലെ ചില ജീവനക്കാരെ സ്വാധീനിച്ചാണ് അളവിലും പത്തിരട്ടിവരെ മദ്യം പലരും വില്‍പനയ്ക്കായി വാങ്ങുന്നത്.
ഇരുചക്ര വാഹനങ്ങളിലും ഓട്ടോറിക്ഷകളിലും വിദേശമദ്യം വില്‍പന നടത്തുന്ന സംഘങ്ങള്‍ വ്യാപകമാണെന്ന പരാതി നേരത്തേതന്നെ ശക്തമായിരുന്നു.