വേങ്ങര: ദേശീയപാതയിലെ കൊളപ്പുറത്തു നിയന്ത്രണംവിട്ടു മറിഞ്ഞ ടാങ്കറിലെ സ്പിരിറ്റ് കഴിഞ്ഞ ദിവസം നീക്കംചെയ്തു. തൃശൂരിലെ കെ.സി ഡിസ്റ്റിലറിയുടെ ടാങ്കര്‍ എത്തിച്ചാണ് അപകടത്തില്‍പെട്ട വാഹനത്തില്‍നിന്നു സ്പിരിറ്റ് മാറ്റിയത്.
പുതുക്കോട്ടുള്ള ഇവരുടെ കമ്പനിയിലേക്ക് ഇന്ത്യന്‍ നിര്‍മിത വിദേശമദ്യ നിര്‍മാണത്തിനായി മഹാരാഷ്ട്രയില്‍നിന്ന് എക്‌സട്രാന്യൂട്ടറല്‍ ആള്‍ക്കഹോള്‍ കയറ്റിവന്ന ടാങ്കറാണ് ഞായറാഴ്ച പുലര്‍ച്ചെ കൊളപ്പുറം ഇറക്കത്തില്‍ അപകടത്തില്‍പെട്ടിരുന്നത്. നിയന്ത്രണംവിട്ടു റോഡില്‍ മറിഞ്ഞതിനെത്തുടര്‍ന്നു സ്പിരിറ്റ് ചോരുകയും ഇതുവഴിയുള്ള ഗതാഗതം മണിക്കുറുകളോളം തടസപ്പെടുകയും ചെയ്തിരുന്നു. അപകടം നടന്ന ദിവസം മുതല്‍ സ്പിരിറ്റ് മാറ്റുന്നവരെ ടാങ്കറിനു പൊലിസ് കാവലേര്‍പ്പെടുത്തിയിരുന്നു. ഡ്രൈവര്‍ ഉറങ്ങിയതാണ് അപകടത്തിനു കാരണമെന്നാണ് പ്രാഥമിക നിഗമനം.
അതേസമയം, പെട്ടെന്നു തീപിടിക്കുന്ന സാധനസാമഗ്രികള്‍ കയറ്റിപ്പോകുന്ന വാഹനങ്ങളില്‍ പാലിക്കേണ്ട മുന്‍കരുതലുകളോ സുരക്ഷാ സംവിധാനങ്ങളോ വാഹനത്തിലില്ലാത്തതാണ് അപകടത്തിനു കാരണമായതെന്ന് ആക്ഷേപമുണ്ട്. വേങ്ങര എസ്.ഐ രാജേന്ദ്രന്‍ നായര്‍, എക്‌സൈസ് സി.ഐ നിസാം എന്നിവരുടെ നേതൃത്വത്തില്‍ കനത്ത സുരക്ഷയിലാണ് സ്പിരിറ്റ് മറ്റൊരു ടാങ്കറിലേക്കു മാറ്റിനിറച്ചത്.