ചാലക്കുടി: മുനിപ്പാറയില്‍ എക്‌സൈസ് സംഘം നടത്തിയ റെയ്ഡില്‍ വ്യാജചാരായം തയാറാക്കുകയായിരുന്ന രണ്ടംഗ സംഘത്തിലെ ഒരാളെ പിടികൂടി. കൂട്ടാളി വനത്തിലേക്ക് ഓടി രക്ഷപ്പെട്ടു.
കാഞ്ഞിരപ്പിള്ളി ഏമാശേരി വീട്ടില്‍ വേലായുധന്‍(47)ആണ് പിടിയിലായത്. ഇയാളുടെ കൂട്ടാളി കാഞ്ഞിരപ്പിള്ളി കൊല്ലപ്പറമ്പില്‍ മഹേഷ്(36) ഓടി രക്ഷപ്പെട്ടു.
ഇവരില്‍ നിന്ന് ആറ് ലിറ്റര്‍ ചാരായം, വാറ്റുപകരണങ്ങള്‍, സ്റ്റൗവ്, ഗ്യാസ് സിലിണ്ടര്‍, വാറ്റിനുപയോഗിച്ചിരുന്ന പാത്രങ്ങള്‍, 170ലിറ്റര്‍ വാഷ് എന്നിവയും എക്‌സൈസ് സംഘം പിടിച്ചെടുത്തു. മുനിപ്പാറയില്‍ സ്വകാര്യ വ്യക്തിയുടെ പറമ്പില്‍ കുറച്ച് കാലങ്ങളായി ഇവര്‍ വ്യാജചാരായം വാറ്റുകയായിരുന്നുവെന്ന് എക്‌സൈസ് സംഘം അറിയിച്ചു. ഇവിടത്തെ കോളനികളിലാണ് ചാരായം വില്‍പന നടത്തുന്നത്. ഇതേ തുടര്‍ന്ന് മുനിപ്പാറ കോളനി മദ്യത്തിന് അടിമയായിരിക്കുകയാണെന്നും സംഘം അറിയിച്ചു. പ്രദേശവാസികളുടെ പരാതിയെ തുടര്‍ന്ന് ഒരാഴ്ചക്കാലമായി ഇവര്‍ എക്‌സൈസ് സംഘത്തിന്റെ നിരീക്ഷണത്തിലായിരുന്നു.
ശനിയാഴ്ച രാവിലെ വ്യാജ ചാരായം വാറ്റിക്കൊണ്ടിരിക്കുന്നതിനിടെയാണ് പിടികൂടിയത്. എക്‌സൈസ് ഇന്‍സ്‌പെക്ടര്‍ പി.എല്‍ ബിനുകുമാര്‍, പ്രിവന്റീവ് ഓഫിസര്‍മാരായ കണ്ണന്‍, സുനില്‍കുമാര്‍, സി.പി.ഒമാരായ ഉല്ലാസ്, പോളി, ജോസഫ് എന്നിവരുടെ നേതൃത്വത്തിലായിരുന്നു റെയ്ഡ്.