തിരുവനന്തപുരം : സര്‍ക്കാര്‍-സ്വാശ്രയ സ്ഥാപനങ്ങളിലെ 2017 - 18 വര്‍ഷത്തെ ഡി.ഫാം, ഡിപ്ലോമ ഇന്‍ ഹെല്‍ത്ത് ഇന്‍സ്‌പെക്ടര്‍, മറ്റു പാരാമെഡിക്കല്‍ ഡിപ്ലോമ കോഴ്‌സുകള്‍ എന്നിവയിലേയ്ക്കുള്ള ഏകജാലക പ്രവേശനത്തിന് 25 വരെ അപേക്ഷിക്കാം.
അപേക്ഷാഫീസ് പൊതുവിഭാഗത്തിന് 400 രൂപ, പട്ടിക വിഭാഗത്തിന് 200 രൂപ.
www.lbscetnre.in എന്ന വെബ്‌സൈറ്റില്‍ വ്യക്തിഗത വിവരങ്ങള്‍ രേഖപ്പെടുത്തിയാല്‍ ലഭിക്കുന്ന ചെലാന്‍ ഉപയോഗിച്ച് ഫെഡറല്‍ ബാങ്കിന്റെ കേരളത്തിലെ ശാഖകളില്‍ നിര്‍ദിഷ്ട അപേക്ഷാഫീസ് ഒടുക്കുമ്പോള്‍ അപേക്ഷകര്‍ക്ക് ഓണ്‍ ലൈന്‍ രജിസ്‌ട്രേഷന് വേണ്ടി അപേക്ഷാ നമ്പരും, ചെലാന്‍ നമ്പറും ലഭിക്കും.
പ്രോസ്‌പെക്ടസ് എല്‍.ബി.എസ് സെന്ററിന്റെ ജില്ലാ ഫെസിലിറ്റേഷന്‍ കേന്ദ്രങ്ങളില്‍ നിന്നും, അപേക്ഷാഫീസ് അടച്ചതിന്റെ രസീത് സമര്‍പ്പിച്ചാല്‍ ലഭിക്കും. ഫിസിക്‌സ്, കെമിസ്ട്രി, ബയോളജി, മാത്തമാറ്റിക്‌സ് എന്നിവ പഠിച്ച് പ്ലസ് ടു-വി.എച്ച്.എസ്.സി. പാസായവര്‍ക്ക് ഡി.ഫാമിന് അപേക്ഷിക്കാം. ഫിസിക്‌സ് കെമിസ്ട്രി ആന്‍ഡ് ബയോളജിക്കു ആകെ 40 ശതമാനം മാര്‍ക്കോടെയെങ്കിലും പ്ലസ് ടു-വി.എച്ച്.എസ്.സി. പാസായവര്‍ക്ക് ഹെല്‍ത്ത് ഇന്‍സ്‌പെക്ടര്‍ ഡിപ്ലോമയ്ക്ക് അപേക്ഷിക്കാം. ഇവരുടെ അഭാവത്തില്‍ ഏതെങ്കിലും വിഷയങ്ങളുടെ ഗ്രൂപ്പില്‍ ആകെ 40 ശതമാനം എങ്കിലും മാര്‍ക്കോടെ വിജയിച്ചവര്‍ക്കും ഈ കോഴ്‌സിന് അപേക്ഷിക്കാം. ഫിസിക്‌സ് കെമിസ്ട്രി ആന്‍ഡ് ബയോളജിക്കു ആകെ 40 ശതമാനം മാര്‍ക്കോടെ പ്ലസ് ടു-വി.എച്ച്.എസ്.സി. പാസായവര്‍ക്ക് മറ്റ് എല്ലാ പാരാമെഡിക്കല്‍ കോഴ്‌സുകള്‍ക്കും അപേക്ഷിക്കാം.