മലപ്പുറം: സ്‌കൂള്‍ ക്വിസിലെ ലോക ചാംപ്യനെ കണ്ടെത്താന്‍ ലോകത്തെ നൂറു നഗരങ്ങളില്‍ ലണ്ടന്‍ ആസ്ഥാനമായ ഇന്റര്‍നാഷനല്‍ ക്വിസിങ് അസോസിയേഷന്‍ (ഐ.ക്യൂ.എ) സംഘടിപ്പിക്കുന്ന ലോക ജൂനിയര്‍ ക്വിസിങ് ചാംപ്യന്‍ഷിപ്പ് 16ന് വൈകുന്നേരം മൂന്നിന് മലപ്പുറം ജില്ലയിലെ മാറാക്കര വി.വി.എം.എച്ച്.എസ്.എസില്‍ നടക്കുമെന്ന് സംഘാടകര്‍ വാര്‍ത്തസമ്മേളനത്തില്‍ അറിയിച്ചു. കേരളത്തില്‍ ക്വസ് കേരളയും സീറ്റ അക്കാദമി ഒഫ് എക്‌സലന്‍സും സംയുക്തമായാണ് പരിപാടി സംഘടിപ്പിക്കുന്നത്. ക്വിസിങിലെ ലോക റാങ്കിങ് ലഭിക്കുന്നത് ഈ മത്സരത്തിലെ മാര്‍ക്ക് അടിസ്ഥാനമാക്കിയാണ്. ലോക ചാമ്പ്യന്‍ഷിപ്പിനോടനുബന്ധിച്ച് റിവര്‍ബരേറ്റ് സ്‌കൂള്‍ എഡിഷന്‍ ക്വിസ് ഫെസ്റ്റിവലും നടക്കും.
16നും 17നുമാണ് ഈ ഫെസ്റ്റിവലും നടക്കുക. വിവിധ വിഷയങ്ങളെ സംബന്ധിച്ച് ഇംഗ്ലീഷിലുള്ള ചോദ്യങ്ങളുമായി രണ്ടുമണിക്കൂര്‍ ദൈര്‍ഘ്യമുള്ള എഴുത്ത് പരീക്ഷയായിരിക്കും ഉണ്ടായിരിക്കുക.
16ന് രാവിലെ 9.30ന് നടക്കുന്ന ഉദ്ഘാടന സമ്മേളനത്തില്‍ മന്ത്രി കെ.ടി. ജലീല്‍, നിയമസഭ സ്പീക്കര്‍ പി. ശ്രീരാമകൃഷ്ണന്‍, എം.പി.മാരായ പി.കെ. കുഞ്ഞാലിക്കുട്ടി, ഇ.ടി. മുഹമ്മദ് ബഷീര്‍ തുടങ്ങിയവര്‍ സംബന്ധിക്കും.
17ന് രാവിലെ 9.30ന് നടക്കുന്ന ജനറല്‍ ക്വിസ് പൊതുമരാമത്ത് സെക്രട്ടറി എ.പി.എം മുഹമ്മദ് ഹനീഷ് നയിക്കും. ലൈഫ്മിഷന്‍ പ്രൊജക്റ്റ് സി.ഇ.ഒ ഡോ. അദീല അബ്ദുള്ള, ഐ.ക്യൂ.എ സൗത്ത് ഇന്ത്യ ഡയറക്ടര്‍ സ്‌നേഹജ് ശ്രീനിവാസ് തുടങ്ങിയവരും സംബന്ധിക്കും. രണ്ടര ലക്ഷം രൂപയുടെ സമ്മാനങ്ങള്‍ ഉണ്ടായിരിക്കും. താല്‍പര്യമുള്ള മത്സരാര്‍ഥികള്‍ 12ന് മുമ്പ് രജിസ്റ്റര്‍ ചെയ്യണം.
വാര്‍ത്താസമ്മേളനത്തില്‍ എം.ഡി ലിജു, റഷീദ് വട്ടപ്പറമ്പന്‍, എ.കെ. മുസ്തഫ, കെ.പി. വഹീദ എന്നിവര്‍ പങ്കെടുത്തു.