യാങ്കോന്‍: മ്യാന്മറിലെ കലാപബാധിത പ്രദേശങ്ങളില്‍ പ്രവര്‍ത്തനം ഊര്‍ജിതമാക്കാന്‍ അന്താരാഷ്ട്ര സന്നദ്ധ സംഘടനയായ റെഡ്‌ക്രോസ് നീക്കം. മ്യാന്മറില്‍നിന്ന് യു.എന്‍ സംഘത്തെ പിന്‍വലിച്ചതോടെയാണ് പ്രവര്‍ത്തനം ശക്തമാക്കാന്‍ റെഡ്‌ക്രോസ് തീരുമാനിച്ചത്.
യു.എന്‍ അഭയാര്‍ഥി-സന്നദ്ധ സംഘങ്ങള്‍ റോഹിംഗ്യക്കാര്‍ക്ക് സഹായം നല്‍കുന്നതായി ആരോപിച്ച് മ്യാന്മര്‍ സര്‍ക്കാര്‍ സംഘത്തെ പിന്‍വലിക്കാന്‍ ആവശ്യപ്പെടുകയായിരുന്നു. ഭക്ഷണം, വെള്ളം, മരുന്ന് എന്നിവയുമായെത്തിയ മറ്റു സന്നദ്ധ സംഘങ്ങളെയും മ്യാന്മര്‍ സര്‍ക്കാര്‍ സൈനികാതിക്രമം രൂക്ഷമായ രാഖൈനില്‍ പ്രവേശിക്കുന്നത് തടഞ്ഞിരുന്നു.
യു.എന്നിനും അന്താരാഷ്ട്ര എന്‍.ജി.ഒകള്‍ക്കും രാഖൈനില്‍ പ്രവര്‍ത്തിക്കാനാകുമെങ്കിലും തങ്ങളുടെ ജീവനക്കാരുടെ സുരക്ഷ ഉറപ്പാക്കാന്‍ ആകാത്തത്തിനാല്‍ അവര്‍ പ്രവര്‍ത്തനം നിര്‍ത്തിവയ്ക്കുകയായിരുന്നു. ഇത്തരമൊരു സാഹചര്യത്തില്‍ സര്‍ക്കാരാണ് തങ്ങളെ ക്ഷണിച്ചതെന്ന് റെഡ്‌ക്രോസ് പ്രതിനിധി ജോയ് സിംഗല്‍ പറഞ്ഞു. യു.എന്നിനു കീഴിലുള്ള വേള്‍ഡ് ഫുഡ് പ്രോഗ്രാം(ഡബ്ലു.എഫ്.പി) പ്രവര്‍ത്തനം നിര്‍ത്തിയതോടെ നിരവധി പേര്‍ ആഴ്ചകളായി ഭക്ഷണമില്ലാതെ പട്ടിണിയില്‍ കഴിയുകയാണെന്നും അദ്ദേഹം പറഞ്ഞു.
അതിനിടെ, രണ്ട് ആഴ്ചയ്ക്കിടെ രാഖൈനില്‍നിന്ന് ബംഗ്ലാദേശിലേക്കു കടന്ന റോഹിംഗ്യന്‍ അഭയാര്‍ഥികളുടെ എണ്ണം മൂന്ന് ലക്ഷത്തോളമായതായി യു.എന്‍ അഭയാര്‍ഥി ഏജന്‍സി അറിയിച്ചു. കഴിഞ്ഞ ദിവസം 20,000 പേരാണു രാജ്യം വിട്ടത്.