ചാരുംമൂട്: കെ.എസ്.ഇ.ബിയുടെ വൈദ്യുത ബില്ല് ഉപയോക്താക്കളെ വട്ടംചുറ്റിക്കുന്നു. വീട്ടില്‍ വന്ന് റീഡിങ് നോക്കി അപ്പോള്‍ തന്നെ തരുന്ന ബില്ലില്‍നിന്നും തുകയും മറ്റ് അക്ഷരങ്ങളും മാഞ്ഞുപോകുന്ന സ്ഥിതിയാണുളളത്.
പേപ്പറിലോ മഷിയിലോ ഉണ്ടാകുന്ന കുഴപ്പമാണ് ഉപഭോക്താക്കളെ ചുറ്റിക്കുന്നത്. തുണ്ടു പേപ്പറിന്റെ രൂപത്തിലുള്ള ഈ ബില്ല് വീടുകളില്‍ സൂക്ഷിക്കുവാനും നന്നേ പാടുപെടുകയാണ്. പഴയ രീതിയിലുണ്ടായിരുന്ന ബില്ലില്‍ നേരത്തെ മീറ്റര്‍ റീഡിങിന് വന്ന തീയതിയും മറ്റ് വിവരങ്ങളും ഉപയോക്താക്കള്‍ക്ക് സഹായകരമായിരുന്നു.
പുതിയ ബില്ലിലെ തുക ഊഹിച്ച് എടുക്കേണ്ട സ്ഥിതിയിലുമാണ്. അശാസ്ത്രീയമായ കെ.എസ്.ഇ.ബിയുടെ പുതിയ തരത്തിലുള്ള ബില്ല് കാഷ്യര്‍മാരെയും വട്ടംചുറ്റിക്കുന്നുണ്ട്. കണ്‍സ്യൂമര്‍ നമ്പര്‍ മാഞ്ഞ് പോകുന്നതാണ് ഇവര്‍ക്ക് തലവേദനയുണ്ടാക്കുന്നത്. പഴയതരത്തിലുള്ള ബില്ല് തന്നെ മതിയെന്നാണ് ഭൂരിപക്ഷം ഉപയോക്താക്കളുടേയും ആവശ്യം.