കൊച്ചി: വീടിന് കരിഓയില്‍ ഒഴിച്ചവര്‍ക്ക് നടന്‍ ശ്രീനിവാസന്റെ പരിഹാസം. കരിഓയില്‍ ഒഴിച്ചവര്‍ വീടു മുഴുവനായി ചെയ്തിരുന്നെങ്കില്‍ പെയിന്റിങ്ങിന്റെ പണം ലാഭിക്കാമായിരുന്നുമെന്ന് ശ്രീനിവാസന്‍ പറഞ്ഞു. ദിലീപിനെ പിന്തുണച്ചുവെന്നതിന്റെ പേരിലാണോ വീട്ടില്‍ കരിഓയില്‍ ഒഴിച്ചതെന്ന് അറിയില്ല. അങ്ങനെയാണെന്ന് വിശ്വസിക്കാന്‍ ആഗ്രഹിക്കുന്നില്ല.
ദിലീപിന് അനുകൂലമായി താന്‍ പ്രത്യേകിച്ചൊന്നും പറഞ്ഞിട്ടില്ല. വര്‍ഷങ്ങളായി ദിലീപിനെ അറിയാവുന്ന ആളെന്ന നിലയില്‍ ഇത്തരമൊരു ഹീനകൃത്യം ദിലീപ് ചെയ്യുമെന്നു വിശ്വസിക്കുന്നില്ലെന്നാണ്് പറഞ്ഞത്. പൊലിസിനെതിരേ പറയാന്‍ താനാളല്ല. ദിലീപിനെ അനുകൂലിച്ചതിന്റെ പേരിലാണ് തന്റെ വീട്ടില്‍ കരിഓയില്‍ ഒഴിച്ചതെങ്കില്‍ ദിലീപിനെ അനുകൂലിച്ച എല്ലാവരുടെയും വീട്ടില്‍ കരിഓയില്‍ പ്രയോഗം നടത്തണം. അതിന് ഇന്ത്യയിലെ കരിഓയില്‍ തികഞ്ഞില്ലെങ്കില്‍ വിദേശത്തുനിന്ന് ഇറക്കുമതി ചെയ്യണം.
ഈ ദിവസങ്ങളില്‍ കരിഓയിലിന് വലിയ ഡിമാന്‍ഡ് ഉണ്ടാകുമെന്നും ശ്രീനിവാസന്‍ പരിഹസിച്ചു. ദിലീപിനെ അനുകൂലിച്ച് സംസാരിച്ചാല്‍ സാക്ഷികളെ സ്വാധീനിക്കുമെങ്കില്‍ ദിലീപിനെ എതിര്‍ത്തു സംസാരിച്ചാലും അതു സാക്ഷികളെ സ്വാധീനിക്കല്‍ തന്നെയാണെന്നും അദ്ദേഹം പറഞ്ഞു.