കൊണ്ടോട്ടി: മെര്‍ക്കുറി പൂശി ഒളിപ്പിച്ചു കടത്താന്‍ ശ്രമിച്ച 1.3495 കിലോഗ്രാം സ്വര്‍ണം കരിപ്പൂര്‍ വിമാനത്താവളത്തില്‍ പിടികൂടി. എയര്‍ ഇന്ത്യ എക്‌സ്പ്രസിന്റെ ഐ.എക്‌സ് 348 ദമാം വിമാനത്തില്‍ കരിപ്പൂരിലെത്തിയ കൊടുവള്ളി സ്വദേശി ഹുസൈനില്‍ (27) നിന്നാണ് സ്വര്‍ണം പിടികൂടിയത്.
ട്രോളി ബാഗിന്റെ പിടിക്കടിയില്‍ പ്രത്യേക ഫ്രെയിം തീര്‍ത്ത് സ്വര്‍ണത്തിന്റെ കമ്പികള്‍ ഫ്രെയിമില്‍ പ്രത്യേകം ഒട്ടിച്ച നിലയിലായിരുന്നു. സ്വര്‍ണമാണെന്ന് തിരിച്ചറിയാതിരിക്കാന്‍ ഇതില്‍ മെര്‍ക്കുറി പൂശി വെളുപ്പിക്കുകയും ചെയ്തിരുന്നു. ഇതിനു മുകളില്‍ റെക്‌സിന്‍ ഒട്ടിച്ചാണ് ട്രോളി ബാഗിന്റെ പിടി തയാറാക്കിയിരുന്നത്. പരിശോധനകളില്‍ പെട്ടെന്ന് കണ്ടെത്താന്‍ കഴിയാത്ത വിധത്തിലാണ് ഇവ ഒട്ടിച്ചുവച്ചിരുന്നത്. രഹസ്യവിവരം ലഭിച്ചതിനെ തുടര്‍ന്ന് എയര്‍ കസ്റ്റംസ് ഇന്റലിജന്‍സ് വിഭാഗം ഇയാളെ പരിശോധിക്കുകയായിരുന്നു. കണ്ടെടുത്ത സ്വര്‍ണത്തിന് ഇന്ത്യന്‍ വിപണിയില്‍ 41,69,955 രൂപ വിലവരും. കസ്റ്റംസ് അസി. കമ്മിഷണര്‍ ജോയ് തോമസിന്റെ നേതൃത്വത്തില്‍ സൂപ്രണ്ടുമാരായ ബഷീര്‍ അഹമ്മദ്, മുഹമ്മദ് അഷ്‌റഫ്, ഇന്‍സ്‌പെക്ടര്‍മാരായ സന്ദീപ് നാന്‍, ദിനേഷ്‌കുമാര്‍, ഗോപിനാഥ് എന്നിവരടങ്ങിയ സംഘമാണ് കള്ളക്കടത്ത് പിടികൂടിയത്.