ഹൈദരാബാദ്: എഴുത്തുകാരനും ചിന്തകനും ദലിത് പുരോഗമനപ്രവര്‍ത്തകനുമായ കാഞ്ച ഐലയ്യക്കെതിരേ വധഭീഷണി. ഞായറാഴ്ചയാണ് അദ്ദേഹത്തെ ഫോണില്‍ വിളിച്ച് നാവ് അരിഞ്ഞു തള്ളുമെന്ന് പറഞ്ഞ് ഭീഷണിമുഴക്കിയത്. സംഭവത്തെ തുടര്‍ന്ന് അദ്ദേഹം ഹൈദരാബാദിലെ ഒസ്മാനിയ സര്‍വകലാശാല പൊലിസ് സ്റ്റേഷനില്‍ പരാതി നല്‍കി.
തനിക്ക് നിരവധി ഭീഷണി ഫോണ്‍ സന്ദേശങ്ങളാണ് ഞായറാഴ്ച വന്നത്. ഇതിലെല്ലാം വധഭീഷണിയാണ് ഉണ്ടായിരുന്നത്. അന്താരാഷ്ട്ര ആര്യ-വൈശ്യ സംഘം അധ്യക്ഷന്‍ കെ. രാമകൃഷ്ണ തന്നെ പലപ്പോഴായി ഭീഷണിപ്പെടുത്തിയിരുന്നതായും അദ്ദേഹം ആരോപിച്ചു. തന്റെ നാക്ക് അരിയുമെന്നും കോലം കത്തിക്കുമെന്നും ഫോണില്‍ സന്ദേശം എത്താറുണ്ട്. തനിക്ക് എന്തെങ്കിലും സംഭവിക്കുകയാണെങ്കില്‍ അതിനു പിന്നില്‍ അന്താരാഷ്ട്ര ആര്യ-വൈശ്യ സംഘമായിരിക്കുമെന്നും അദ്ദേഹം പരാതിയില്‍ പറയുന്നു.
ഐലയ്യ എഴുതിയ സാമാജിക സ്മഗ്‌ളുരുലു കൊമത്തൊള്ളു(വൈശ്യാസ് ആര്‍ സോഷ്യല്‍ സ്മഗ്‌ളേഴ്‌സ്) എന്ന പുസ്തകം പ്രസിദ്ധീകരിച്ച ശേഷമാണ് കടുത്ത എതിര്‍പ്പ് ഉയരാന്‍ തുടങ്ങിയത്.
സമുദായത്തെ അപകീര്‍ത്തിപ്പെടുത്തുന്നതാണെന്ന് കാണിച്ച് ഐലയ്യക്കെതിരേ നേരത്തെ മാനനഷ്ടക്കേസ് ഫയല്‍ ചെയ്തിരുന്നു.
പുസ്തകം പിന്‍വലിക്കണമെന്നും ഇവര്‍ ആവശ്യപ്പെട്ടിരുന്നു. പുസ്തകം പ്രസിദ്ധീകരിച്ചതിനെതിരേ പൊലിസില്‍ പരാതി നല്‍കിയതായി ആന്ധ്രാപ്രദേശ് ആര്യ-വൈശ്യ മഹാസഭ പ്രസിഡന്റ് ജെ. വെങ്കടേശ്വര്‍ അറിയിച്ചു.