ചേര്‍ത്തല: കെ.എസ്.ആര്‍.ടി.സി ബസില്‍ നിന്നു തോക്ക് കണ്ടെത്തി. ചേര്‍ത്തല ഡിപ്പോയില്‍ നിന്നും നിലമ്പൂരിലേക്ക് സര്‍വീസ് നടത്തുന്ന ബസില്‍ ബാഗിനുള്ളിലാണ് എയര്‍ഗണ്‍ വിഭാഗത്തിലുള്ള തോക്ക് കണ്ടെത്തിയത്. ഡിപ്പോയില്‍ നിന്നുള്ള ആദ്യത്തെ സര്‍വീസ് ഇന്നലെ പുലര്‍ച്ചെ ആരംഭിക്കുന്നതിനായി ബസ് പുറപ്പെടാനൊരുങ്ങുമ്പോഴാണ് സീറ്റിനടിയില്‍ കണ്ടക്ടര്‍ ബാഗ് കണ്ടത്. തുറന്നു നോക്കിയപ്പോഴാണ് ചെറിയ തോക്ക് ശ്രദ്ധയില്‍പ്പെട്ടത്. തുടര്‍ന്ന് സ്റ്റേഷന്‍ മാസ്റ്ററെ ഏല്‍പിച്ചു.
വിവരമറിഞ്ഞ് എത്തിയ ചേര്‍ത്തല പൊലിസ് തോക്ക് കസ്റ്റഡിയിലെടുത്ത് ആലപ്പുഴ എ.ആര്‍ ക്യാംപില്‍ പരിശോധനയ്ക്ക് അയച്ചു. തുടര്‍ന്നാണ് തോക്ക് ലൈസന്‍സ് ആവശ്യമില്ലാത്ത എയര്‍ഗണ്ണാണെന്ന് വ്യക്തമായത്.
എന്നാല്‍ കേസ് റജിസ്റ്റര്‍ ചെയ്തിട്ടില്ലെന്നും തോക്കിന്റെ ഉടമയെ കണ്ടെത്താന്‍ കഴിഞ്ഞിട്ടില്ലെന്നും പൊലിസ് പറഞ്ഞു.