കോഴിക്കോട്: ശ്രീകൃഷ്ണ ജയന്തി മഹാശോഭായാത്ര നടക്കുന്നതിനാല്‍ ഇന്ന് ഉച്ചയ്ക്ക് രണ്ടു മുതല്‍ നഗരത്തില്‍ ഗതാഗത നിയന്ത്രണം ഏര്‍പ്പെടുത്തിയതായി ട്രാഫിക് പൊലിസ് അറിയിച്ചു. കോരപ്പുഴ ഭാഗത്തുനിന്ന് വരുന്ന ബസുകള്‍ വെസ്റ്റ്ഹില്‍ ചുങ്കത്തുനിന്ന് തിരിഞ്ഞ് കാരപ്പറമ്പ്, എരഞ്ഞിപ്പാലം, അരയിടത്തുപാലം വഴി നഗരത്തിലെത്തണം. ബാലുശേരി ഭാഗത്തുനിന്ന് വരുന്ന ബസുകള്‍ എരഞ്ഞിപ്പാലം അരയിടത്തുപാലം വഴി നഗരത്തിലെത്തണം.
മെഡിക്കല്‍ കോളജ് ഭാഗത്തേക്കു പോകുന്ന സിറ്റി ബസുകള്‍ ഉള്‍പ്പെടെ വുഡ്‌ലാന്‍ഡ് ജങ്ഷന്‍ പുതിയറ ജങ്ഷന്‍ അരയിടത്തുപാലം വഴി തിരിഞ്ഞുപോകണം. രാമനാട്ടുകര ഭാഗത്തുനിന്ന് വരുന്ന ബസുകള്‍ മീഞ്ചന്ത, മാങ്കാവ് അരയിടത്തുപാലം വഴി നഗരത്തിലെത്തണം.
പാളയം സ്റ്റാന്‍ഡിലേക്ക് വരുന്ന ബസുകള്‍ അരയിടത്തുപാലത്തുനിന്ന് കല്ലുത്താന്‍കടവ്, ജയില്‍റോഡ്, പൂന്താനം ജങ്ഷന്‍ വഴി പാളയം സ്റ്റാന്‍ഡില്‍ പ്രവേശിക്കണം. പുതിയാപ്പയിലേക്കു പോകുന്ന ബസുകള്‍ ഹെഡ്‌പോസ്റ്റ് ഓഫിസ് വഴി മലബാര്‍ ക്രിസ്ത്യന്‍ കോളജ് ജങ്ഷനിലെത്തി ഗാന്ധി റോഡ് വഴി തിരിഞ്ഞുപോകണം. പടനിലം ഭാഗത്തുനിന്ന് വരുന്ന ബസുകള്‍ 10-ാം മൈല്‍-പിലാശേരി റോഡ് വരട്ട്യാക്ക്മുണ്ടിക്കല്‍താഴം വഴി മെഡിക്കല്‍ കോളജിലെത്തണം.