കായംകുളം :വിദേശത്ത് പതിനൊന്ന് മാസത്തെ ജയില്‍വാസത്തിന് ശേഷം ശിക്ഷയില്‍ ഇളവ് ലഭിച്ചതോടെ മലയാളി ജയില്‍ മോചിതനായി നാട്ടിലെത്തി .കായംകുളം എരുവ മരങ്ങാട്ട് തെക്കേത്തറ വീട്ടില്‍ അബ്ദുല്‍ റഹീം (38 )ആണ് ബഹ്‌റൈന്‍ ജയിലിലെ ജയില്‍വാസത്തിന് ശേഷം മോചിതനായി ഇന്നലെ നാട്ടിലെത്തിയത് .കഴിഞ്ഞ പെരുന്നാളിന് തടവുകാര്‍ക്ക് ശിക്ഷാ ഇളവ് പ്രഖ്യാപിച്ചപ്പോള്‍ റഹീമിനും ഇളവ് ലഭിക്കുകയായിരുന്നു .
2016 ഒക്ടോബര്‍ 26ന് ബഹ്‌റൈനിലെ അല്‍ബ റൗണ്ട് എബൗട്ടിന് സമീപം വച്ച് റഹീം ഓടിച്ച വാഹനം അപകടത്തില്‍ പ്പെടുകയും ബഹ്‌റൈന്‍ പൗരന്‍ മരണപ്പെടുകയും ചെയ്തു.
ഇതേ തുടര്‍ന്ന് പോലീസ് രജിസ്റ്റര്‍ ചെയ്ത കേസില്‍ റഹീമിന് മൂന്നുവര്‍ഷത്തെ ജയില്‍ ശിക്ഷയും ഒരു വര്‍ഷത്തേക്ക് ലൈസന്‍സ് റദ്ദ് ചെയ്തും ബഹ്‌റൈന്‍ കോടതി വിധിച്ചത്.റഹീം ജയിലിലായതോടെ കുടുംബം ദുരിതത്തിലായി.ഭര്‍ത്താവിന്റെ മോചനംതേടി റഹീമിന്റെ ഭാര്യ നജിമോള്‍ പ്രവാസി മലയാളി ഫെഡറേഷന്റെ സഹായത്തോടെ സാമൂഹ്യ പ്രവര്‍ത്തകന്‍ ബഷീര്‍ അമ്പലായിയെ ബന്ധപ്പെടുകയും ഇദ്ദേഹം ഇന്ത്യന്‍ എംബസി, ബഹ്‌റൈന്‍ മതകാര്യ വകുപ്പ് റോയല്‍ കോര്‍ട്ട്എന്നിവടങ്ങളില്‍ ദയാഹര്‍ജി സമര്‍പ്പിക്കുകയും മുഖ്യമന്ത്രി പിണറായി വിജയന്‍ ബഹ്‌റൈനില്‍ എത്തിയപ്പോള്‍ അപേക്ഷ നല്‍കുകയും ചെയ്തിരുന്നു.
കെ.സി വേണുഗോപാല്‍ എം.പി,യു. പ്രതിഭാഹരി എന്നിവര്‍ നിരന്തരമായി ഇടപ്പെടുകയും ചെയ്തു. റഹീമിന് നാട്ടിലേക്കുള്ള യാത്രാടിക്കറ്റ് എടുത്ത് സഹായിച്ചത് ബഹ്‌റൈന്‍ മലയാളി ബിസിനസ് ഫോറമാണ് . ശ്രീലങ്കന്‍ എയര്‍വേഴ്‌സ് വിമാനത്തില്‍ ഇന്നലെ രാവിലെ 8 .45 ഓടെ തിരുവന്തപുരം വിമാനത്താവളത്തില്‍ എത്തിയ റഹീമിനെ ഭാര്യയും മക്കളും ബന്ധുക്കളും ചേര്‍ന്ന് സ്വീകരിച്ചു.ഉച്ചക്ക് ഒരു മണിയോടെ റഹീം കായംകുളത്തുള്ള വീട്ടില്‍ എത്തിച്ചേര്‍ന്നു . റഹീം ജയിലിലായതോടെ കുടുംബവും ദുരിതത്തിലായിരുന്നു.എന്നാല്‍ റഹീമിന്റെ ബഹ്‌റൈനിലെ ഖഫീലായ മുഹമ്മദ് ഈസാ ഖല്‍ഫാന്‍ റഹീമിന് കേസില്‍ അഭിഭാഷകനെ നിയമിക്കാന്‍ സഹായിക്കുകയും ഓരോമാസവും കുടുംബത്തിന് ചിലവിനുള്ള പണം നാട്ടിലേക്ക് അയച്ചു നല്‍കിയും സഹായിച്ചു. വാപ്പയെ കണ്‍കുളിര്‍ക്കെ കാണാന്‍ കഴിഞ്ഞതിന്റെ സന്തോഷത്തിലാണ് റ മക്കളായബിലാലും,ഹസനും,ഹുസൈനുമിപ്പോള്‍.