ബോവിക്കാനം: ജില്ലയുടെ പല ഭാഗങ്ങളിലും മഡ്ക്ക (ചട്ടക്കളി) ചൂതാട്ടത്തിനെതിരേ പൊലിസ് നടപടി സ്വീകരിക്കുന്നിതിനിടെ ബോവിക്കാനം, മുള്ളേരിയ നഗരങ്ങളില്‍ വീണ്ടും ചൂതാട്ടം വ്യാപകമാവുന്നതായി പരാതി.
ഒരു ദിവസം മൂന്നും നാലും നറുക്കെടുപ്പുകള്‍ നടത്തി ലക്ഷകണക്കിന് രൂപയാണ് ചൂതാട്ട മാഫിയകള്‍ കീശയിലാക്കുന്നത്. കൂടുതലും കൂലിപ്പണിക്കാരാണ് ഇവരുടെ വലയില്‍ അകപ്പെടുന്നത്. രണ്ടക്ക നമ്പറുകള്‍ തെരഞ്ഞടുത്ത് അതിനു പണം കെട്ടിവയ്ക്കുന്നതാണ് നറുക്കെടുപ്പു രീതി.
പണം കെട്ടിയ നമ്പര്‍ നറുക്കെടുപ്പില്‍ വന്നാല്‍ കെട്ടിയ തുകയുടെ ഇരട്ടി പണം കെട്ടിയ ആള്‍ക്ക് ലഭിക്കും. പത്തു രൂപക്ക് 700 രുപയാണ് കിട്ടുക. രാവിലെയും വൈകുന്നേരവും നഗരങ്ങളിലെ ചില പെട്ടി കടകള്‍ കേന്ദ്രീകരിച്ചും തണല്‍മരങ്ങളുടെ ചുവട്ടിലുമാണ് എജന്റുമാര്‍ ഇരകളെ കാത്തിരിക്കുന്നത്. നഗരത്തില്‍ പരസ്യമായി നടക്കുന്ന മഡ്ക്ക ചൂതാട്ടത്തിനെതിരേ നടപടി സ്വീകരിക്കണമെന്നാണ് വ്യാപാരികളും നാട്ടുകാരും ആവശ്യപ്പെടുന്നത്.