പാലക്കാട്: മഴവെള്ളം മഴക്കുഴികളിലൂടെയും കിണറുകളിലൂടെയുമെല്ലാം ഭൂമിയില്‍ നിലനിര്‍ത്തുമ്പോഴാണ് ഭൂഗര്‍ഭജലം ഉയരുന്നതെന്നും നാടാകെ ഇത്തരം പ്രവര്‍ത്തനങ്ങള്‍ തുടരണമെന്നും ജലവിഭവ വകുപ്പ് മന്ത്രി മാത്യു.ടി.തോമസ് പറഞ്ഞു. മഴവെള്ളം സമുദ്രത്തിലേക്ക് ഒഴുക്കിവിടുന്ന രീതിക്ക് മാറ്റം വരേണ്ടതുണ്ട്. എലപ്പുള്ളി, നല്ലേപ്പിള്ളി, പെരുമാട്ടി, പട്ടഞ്ചേരി ഗ്രാമപഞ്ചായത്തുകള്‍ക്കായുളള സമഗ്രകുടിവെളള പദ്ധതിയുടെ ഒന്നാംഘട്ടത്തിന്റെ നിര്‍മാണോദ്ഘാടനം നിര്‍വഹിച്ചു സംസാരിക്കുകയായിരുന്നു മന്ത്രി.
മൂലത്തറ സര്‍വ്വീസ് കോ-ഓപ്പറേറ്റീവ് ബാങ്കിനു മുന്‍വശം കന്നിമാരിയില്‍ നടന്ന പരിപാടിയില്‍ കെ. കൃഷ്ണന്‍ കുട്ടി എം.എല്‍.എ അധ്യക്ഷനായി. ചിറ്റൂര്‍, മലമ്പുഴ നിയോജകമണ്ഡലങ്ങളിലെ എലപ്പുള്ളി, നല്ലേപ്പിള്ളി, പെരുമാട്ടി, പട്ടഞ്ചേരി ഗ്രാമപഞ്ചായത്തുകള്‍ക്കായി നടപ്പാക്കുന്ന 1170 ലക്ഷം രൂപയുടെ പദ്ധതി 165724 പേര്‍ക്ക് പ്രയോജനം ലഭിക്കുന്ന വിധത്തിലാണ് വിഭാവനം ചെയ്തിരിക്കുന്നത്. കുന്നങ്കാട്ടുപതിയില്‍ 18 ദശലക്ഷം ലിറ്റര്‍ പ്രതിദിനശേഷിയുളള ജലശുദ്ധീകരണശാല, റോവാട്ടര്‍ പമ്പിങ്ങ് മെയിന്‍, റോവാട്ടര്‍ ക്ലിയര്‍ വാട്ടര്‍ പമ്പ് സെറ്റ് സ്ഥാപിക്കല്‍ എന്നിവയുടെ നിര്‍മാണോദ്ഘാടനമാണ് നിര്‍വഹിച്ചത്.
പി.കെ ബിജു എം.പി മുഖ്യാതിഥിയായി. വി. മുരുകദാസ്, എ. പ്രഭാകരന്‍, ചിറ്റൂര്‍ ബ്ലോക്ക് പഞ്ചായത്ത് പ്രസിഡന്റ് മാധുരി പത്മനാഭന്‍, പെരുമാട്ടി ഗ്രാമപഞ്ചായത്ത് പ്രസിഡന്റ് ജി. മാരിമുത്തു, പട്ടഞ്ചേരി ഗ്രാമപഞ്ചായത്ത് പ്രസിഡന്റ് കെ. ജയശ്രീ, നല്ലേപ്പിള്ളി ഗ്രാമപഞ്ചായത്ത് പ്രസിഡന്റ് പി. ശാര്‍ങ്ധരന്‍, എലപ്പുള്ളി ഗ്രാമപഞ്ചായത്ത് പ്രസിഡന്റ് എ. തങ്കമണി, ജില്ലാ പഞ്ചായത്ത്് അംഗങ്ങളായ കെ. ചിന്നസ്വാമി, എന്‍.എസ് ശില്‍പ പങ്കെടുത്തു.