കരുനാഗപ്പള്ളി: ഓച്ചിറയില്‍ വീട് കയറി ആക്രമിച്ച കേസിലെ ഒരു ഗുണ്ടാനേതാവ് കൂടി പൊലിസ് പിടിയിലായി.
വൈനകം ഗൗരീഭവനത്തില്‍ ടേപ്പോ എന്ന് വിളിക്കുന്ന അരുണ്‍ (23)നെയാണ് ഓച്ചിറ പൊലിസ് പിടികൂടിയത്. ഇയാള്‍ നിരവധി കേസിലെ പ്രതിയാണ്. ഇതോടെ വീട് കയറി ആക്രമിച്ച കേസിലെ ആറംഗ സംഘത്തിലെ മൂന്ന് പേര്‍ അറസ്റ്റിലായി.
തിരുവോണ ദിവസം രാത്രി ഞക്കനാല്‍ സുനില്‍ ഭവനത്തില്‍ സുനിലിനേയും കുടുംബത്തേയും അരുണ്‍ ഉള്‍പ്പെട്ട ആറംഗ സംഘം മാരകായുധങ്ങളുമായി ആക്രമിച്ചിരുന്നു. ഇതില്‍ മാരകമായി മുറിവേറ്റ സുനില്‍ ആലപ്പുഴ വണ്ടാനം മെഡിക്കല്‍ കോളജ് ആശുപത്രിയില്‍ ചികിത്സയിലാണ്.
ഈ കേസില്‍ ഉള്‍പ്പെട്ട മറ്റ് രണ്ട് പ്രതികളായ അലുവാ വിഷ്ണുവിനേയും കുക്കു എന്ന മനുവിനേയും പൊലിസ് നേരത്തെ അറസ്റ്റ് ചെയ്തിരുന്നു.
മൂന്നാം പ്രതിയാണ് ഇപ്പോള്‍ പിടിയിലായ അരുണ്‍. പിടിയിലായ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.