ന്യൂഡല്‍ഹി: ഇന്ത്യയിലെത്തിയ റോഹിംഗ്യന്‍ അഭയാര്‍ഥികളെ മ്യാന്‍മറിലേക്കു നാടുകടത്താനുള്ള നരേന്ദ്ര മോദി സര്‍ക്കാരിന്റെ നീക്കങ്ങളെ ചോദ്യംചെയ്ത് സുപ്രിംകോടതി മുന്‍പാകെ നിലവിലുള്ള ഹരജിയില്‍ മുസ്്‌ലിം യൂത്ത് ലീഗും കക്ഷിചേര്‍ന്നു.
മ്യാന്‍മറില്‍ വംശീയ അതിക്രമത്തില്‍ നിന്നു രക്ഷതേടി ഇന്ത്യയില്‍ അഭയം പ്രാപിച്ച സ്ത്രീകളും കുട്ടികളും ഉള്‍പ്പെടെയുള്ള ജനവിഭാഗത്തിന് സംരക്ഷണംകൊടുക്കാനുള്ള ബാധ്യത യു.എന്‍ ഉടമ്പടി പ്രകാരം ഇന്ത്യക്കുണ്ടെന്ന് ഹരജിയില്‍ യൂത്ത് ലീഗ് ചൂണ്ടിക്കാട്ടി. മ്യാന്‍മറിലെ സ്ഥിതിവിശേഷം അതീവഗുരുതരമാണെന്ന് യു.എന്‍ തന്നെ സ്ഥിരീകരിച്ച സാഹചര്യത്തില്‍ അഭയാര്‍ഥികളെ തിരിച്ചു മ്യാന്‍മറിലേക്കു തന്നെ നാടുകടത്തുന്നത് അവരുടെ ജീവനു ഭീഷണിയാണ്.
അതിനാല്‍ മ്യാന്‍മറില്‍ സാധാരണനില വരുന്നതുവരെ അഭയാര്‍ഥികളെ നാടുകടത്താനുള്ള കേന്ദ്രസര്‍ക്കാരിന്റെ നീക്കങ്ങള്‍ തടയാന്‍ ഇടപെടണമെന്നും ഹരജിയില്‍ ചൂണ്ടിക്കാട്ടി.