കിനാലൂര്‍: പനങ്ങാട് പഞ്ചായത്തിലെ മലയോര പ്രദേശമായ കണ്ണാടിപൊയില്‍, കിനാലൂര്‍, മങ്കയം, തലയാട് ഗ്രാമങ്ങളില്‍ ലഹരി മാഫിയ പിടിമുറുക്കുന്നു. പ്രദേശങ്ങളിലെ യുവാക്കളെ കേന്ദ്രീകരിച്ചാണ് മാഫിയ സംഘങ്ങളുടെ പ്രവര്‍ത്തനം.
ഓരോ പ്രദേശത്ത് നിന്നും യുവാക്കളെ തങ്ങളുടെ ഏജന്റുമാരാക്കാന്‍ മോഹനവാഗ്ദാനങ്ങളാണ് സംഘങ്ങള്‍ നല്‍കുന്നത്. ആളൊഴിഞ്ഞ പറമ്പുകളും വീടുകളും ലഹരി പുകയ്ക്കാനുള്ള താവളങ്ങളായി മാറികഴിഞ്ഞു. നിരവധി സ്‌കൂള്‍ വിദ്യാര്‍ഥികള്‍ ലഹരിക്ക് അടിമകളായി കഴിഞ്ഞു.
മദ്യത്തേക്കാള്‍ അപകടകരമായ ലഹരിവസ്തുക്കളുടെ അടിമകളായി കുട്ടികളും യുവാക്കളും മാറുന്നതിന്റെ ഞെട്ടിക്കുന്ന വിവരങ്ങള്‍ രക്ഷിതാക്കളില്‍ ഭീതിപടര്‍ത്തുന്നുണ്ട്. ഇത്തരം കേസുകളില്‍ പിടിക്കപ്പെടുന്നവരില്‍ അധികപേരും വിദ്യാര്‍ഥികളും യുവാക്കളുമാണ്. ഇതര സംസ്ഥാന തൊഴിലാളികള്‍ വ്യാപകമായി ലഹരിവസ്തുക്കള്‍ നാട്ടിലെത്തിക്കുന്നതായും വിവരമുണ്ട്.
ഈയൊരു ഘട്ടത്തിലാണ് പനങ്ങാട് പഞ്ചായത്ത് മുസ്‌ലിം ലീഗ് കമ്മിറ്റി ലഹരി മാഫിയകള്‍ക്കെതിരേ ശക്തമായ പ്രവര്‍ത്തനങ്ങളുമായി രംഗത്തെത്തിയത്. ലഹരിവസ്തുക്കളുടെ ഉപയോഗവും വില്‍പനയും ഘട്ടംഘട്ടമായി ഇല്ലാതാക്കാനുള്ള പ്രവര്‍ത്തനങ്ങള്‍ക്കാണ് മുസ്‌ലിം ലീഗ് കമ്മിറ്റി രൂപം നല്‍കുക. ഒരു വര്‍ഷം നീണ്ട് നില്‍ക്കുന്ന ലഹരി വിരുദ്ധ ക്യാംപയിന് പഞ്ചായത്തില്‍ തുടക്കമായി.
ലഹരി മാഫിയകളുടെ പ്രവര്‍ത്തനങ്ങളെ ചെറുക്കാന്‍ ലഹരി വിരുദ്ധ സേനക്കും പാര്‍ട്ടി രൂപം നല്‍കി കഴിഞ്ഞു. കുറ്റികണ്ടി അബൂബക്കര്‍ (ചെയര്‍മാന്‍), നാസര്‍ പി.കെ(കണ്‍വീനര്‍), എം.കെ അന്‍വര്‍ മാസ്റ്റര്‍ (ട്രഷറര്‍) എന്നിവരാണ് ഭാരവാഹികള്‍.