പയ്യോളി: തിക്കോടി ഗ്രാമപഞ്ചായത്ത് പുറക്കാട് എട്ടാം വാര്‍ഡ് ഉപതെരഞ്ഞെടുപ്പ് നാളെ നടക്കും. യു.ഡി.എഫിലെ കെ.വി ദാമോദരന്റെ വിയോഗത്തെ തുടര്‍ന്നാണ് ഉപതെരഞ്ഞെടുപ്പ് വേണ്ടിവന്നത്. കോണ്‍ഗ്രസ് സ്ഥാനാര്‍ഥി തിക്കോടി രാഘവന്‍ എല്‍.ഡി.എഫിലെ സി.പി.എം സ്ഥാനാര്‍ഥി അഡ്വ. സുഭാഷ് രയരോത്തും തമ്മിലാണ് പ്രധാന മത്സരം. ഷൈമ രയരോത്താണ് ബി.ജെ.പി സ്ഥാനാര്‍ഥി.
തെരഞ്ഞെടുപ്പ് പ്രചാരണത്തിന് സംസ്ഥാന-ജില്ലാ നേതാക്കള്‍ പ്രദേശത്ത് എത്തിയിരുന്നു. യു.ഡി.എഫിനുവേണ്ടി ടി. സിദ്ദീഖ്, എല്‍.ഡി.എഫിനുവേണ്ടി പി. വിശ്വന്‍, കെ. ദാസന്‍ എം.എല്‍.എ, ബി.ജെ.പിക്കുവേണ്ടി കെ. സുരേന്ദ്രന്‍ എന്നിവരാണ് എത്തിയത്. കഴിഞ്ഞ തിരഞ്ഞെടുപ്പില്‍ 156 വോട്ടിനാണ് യു.ഡി.എഫിലെ കെ.വി ദാമോദരന്‍ വിജയിച്ചത്. 17 അംഗ ഭരണസമിതിയില്‍ 11 സീറ്റാണ് യു.ഡി.എഫിനുള്ളത്. എല്‍.ഡി.എഫിന് നാലും ഒന്ന് സ്വതന്ത്രനുമാണ്. 15ന് രാവിലെ വോട്ടെണ്ണല്‍ നടക്കും.