പാലാ: കെ.എസ്.ആര്‍.ടി.സി ബസ് സ്റ്റാന്‍ഡിന് മുന്നില്‍ അശാസ്ത്രീയമായി നിര്‍മിച്ച ഓടകള്‍ കാല്‍നടയാത്രക്കാര്‍ക്ക് ഭീഷണിയാകുന്നു. സ്ലാബുകള്‍ നിരതെറ്റി കിടക്കുന്നതും തെന്നിനീങ്ങുന്നതും മൂലം ദിവസേന നിരവധിയാളുകളാണ് ഇവിടെ വീഴുന്നത്. മെയിന്‍ റോഡിലെ ഓട്ടോ സ്റ്റാന്‍ഡിന് വശത്തുകൂടിയാണ് നടപ്പാത നിര്‍മിച്ചിരിക്കുന്നത്.
കഴിഞ്ഞദിവസം രണ്ട് സ്ലാബുകള്‍ തെന്നി വീണതിനെ തുടര്‍ന്ന് ഓട്ടോ ഡ്രൈവര്‍മാര്‍ ഫഌക്‌സ് ബോര്‍ഡുകളും മാറ്റും ഉപയോഗിച്ച് താല്‍കാലികമായി വഴിയടച്ചിട്ടുണ്ട്. രാത്രികാലങ്ങളില്‍ ഇവിടെ കെ.എസ്.ആര്‍.ടി.സി ബസുകള്‍ പാര്‍ക്ക് ചെയ്യുന്നുണ്ടെന്നും റോഡിന്റെ വശത്തേക്ക് ബസുകള്‍ ചേര്‍ക്കുമ്പോള്‍ ടയറുകള്‍ സ്ലാബില്‍ കയറുന്നതും നിരങ്ങി നീങ്ങുന്നതുമാണ് അപകടത്തിന് കാരണമാക്കുന്നതെന്ന് നാട്ടുകാര്‍ പറയുന്നു.
കഴിഞ്ഞദിവസങ്ങളില്‍ വൃദ്ധനും സ്ത്രീയുമുള്‍പ്പെടെ അരഡസനോളം ആളുകള്‍ അപകടത്തില്‍പെട്ടു.
തൊടുപുഴ റോഡിലെ ആരാധനാലയത്തിലേക്കും ബസ് സ്റ്റാന്‍ഡ്, സ്‌കൂള്‍, എംപ്ലോയിമെന്റ് എകസ്‌ചേഞ്ച്, തിയേറ്റര്‍ എന്നിവിടങ്ങളിലേക്ക് ആയിരക്കണക്കിനാളുകള്‍ പോകുന്ന നടപാതയിലാണ് ദുരവസ്ഥയുള്ളത്. നഗരസഭാ അതികൃതരോട് നിരവധി തവണ പരാതിപ്പെട്ടിട്ടും നടപടിയായിട്ടില്ലെന്ന് ഓട്ടോ തൊഴിലാളികള്‍ പറഞ്ഞു.