തൊടുപുഴ: തൊടുപുഴ നഗര മധ്യത്തില്‍ പെട്രോള്‍ പമ്പുടമയെയും ഭാര്യയെയും വീട് ആക്രമിച്ച് കീഴ്‌പ്പെടുത്തി പണവും സ്വര്‍ണാഭരണവും കവര്‍ന്ന ഇതര സംസ്ഥാനക്കാരായ മൂന്നു പ്രതികള്‍ക്ക് മൂന്നു വര്‍ഷം വീതം കഠിനതടവും 20,000 രൂപ വീതം പിഴയും കോടതി ശിക്ഷ വിധിച്ചു.
ഒഡീഷ റായ്ഗഡ് ജില്ലയില്‍ മുനിഗുഡ റെയില്‍വേ കോളനിയിലെ താമസക്കാരായ ചിങ്കു കര്‍ക്കരിയ(21), രമേശ് ചിച്ചുവാന്‍(24), റായ്ഗഡ് ജില്ലയിലെ അങ്കോല സ്വദേശി രാജ്കുമാര്‍ പത്ര (രാജാ 19)എന്നിവരെയാണ് തൊടുപുഴ ചീഫ് ജുഡീഷ്യല്‍ മജിസ്‌ട്രേറ്റ് ഹഫീസ് മുഹമ്മദ് ശിക്ഷിച്ചത്. കേസിലെ ഒന്നാം പ്രതി ഹനുമന്ത്പുരി സ്വദേശിയായ പതിനേഴുകാരനെ നാലു മാസം മുന്‍പ് തൊടുപുഴ ജുവനൈല്‍ ജസ്റ്റിസ് ബോര്‍ഡ് മൂന്നു വര്‍ഷം തടവിന് ശിക്ഷിച്ചിരുന്നു. ഇയാള്‍ ഇപ്പോള്‍ കോട്ടയം സ്‌പെഷല്‍ ഹോമിലാണുള്ളത്.
ഭവനഭേദനം, ആക്രമിച്ച് പരിക്കേല്‍പ്പിക്കല്‍ എന്നീ കുറ്റകൃത്യങ്ങള്‍ക്കാണ് ശിക്ഷ വിധിച്ചത്. ഭവനഭേദനത്തിന് മൂന്നു വര്‍ഷം വീതം കഠിന തടവും 10000 രൂപ വീതം പിഴയും ആക്രമിച്ച് പരുക്കേല്‍പിച്ചതിന് മൂന്നു വര്‍ഷം വീതം കഠിന തടവും 10,000 രൂപ വീതം പിഴയുമാണ് ശിക്ഷ. പിഴ അടച്ചില്ലെങ്കില്‍ നാലു മാസം വീതം തടവു കൂടി അനുഭവിക്കണം. എല്ലാ ശിക്ഷകളും ഒരുമിച്ച് അനുഭവിച്ചാല്‍ മതി.
2016 സെപ്തംബര്‍ 13 ന് ഉത്രാടദിനത്തിലായിരുന്നു കേസിനാസ്പദമായ സംഭവം. തൊടുപുഴയിലെ പ്രകാശ് ഫ്യുവത്സ് ഉടമ കൃഷ്ണ വിലാസത്തില്‍ കെ ബാലചന്ദ്രനെയും ഭാര്യ ശ്രീജയെയും വീടിനുള്ളില്‍ അതിക്രമിച്ച് കടന്ന് കീഴ്‌പ്പെടുത്തി ബന്ധിച്ച ശേഷമായിരുന്നു മോഷണം.
പെട്രോള്‍ പമ്പിലെ കലക്ഷന്‍ തുകയായ 1.70 ലക്ഷം രൂപയും അഞ്ചര പവന്റെ സ്വര്‍ണവും മൊബൈല്‍ ഫോണുകളും ഐപാഡും മോഷ്ടാക്കള്‍ കവര്‍ന്നിരുന്നു.
ഇതര സംസ്ഥാന തൊഴിലാളികളാണ് മോഷണത്തിന് പിന്നിലെന്ന് തിരിച്ചറിഞ്ഞതിനെ തുടര്‍ന്ന് തൊടുപുഴ ഡി.വൈ.എസ്.പി എന്‍.എന്‍ പ്രസാദിന്റെ നേതൃത്വത്തിലുള്ള അന്വേഷണസംഘം വളരെ പെട്ടെന്ന് തന്നെ പ്രതികളെ പിടികൂടിയിരുന്നു. സ്വന്തം നാട്ടിലേക്ക് രക്ഷപെട്ട മോഷ്ടാക്കളെ അവിടെയെത്തിയാണ് പൊലിസ് പിടികൂടിയത്.
രാജ്കുമാര്‍ പത്രയെയും ഹനുമന്ത്പുരി സ്വദേശിയായ പതിനേഴുകാരനെയും തൊടുപുഴ പ്രിന്‍സിപ്പല്‍ എസ്.ഐയായിരുന്ന ജോബിന്‍ ആന്റണിയുടെ നേതൃത്വത്തില്‍ സെപ്റ്റംബര്‍ 26 നാണ് പിടികൂടിയത്.
വീട്ടില്‍ നിന്നും കവര്‍ന്ന് പങ്കിട്ടെടുത്ത പണത്തില്‍ നിന്നും 8,000 രൂപയും ശ്രീജയുടെ മൊബൈല്‍ ഫോണും ഇവരില്‍ നിന്നും കണ്ടെടുത്തിരുന്നു. ഇവരില്‍ നിന്ന് ലഭിച്ച വിവരങ്ങളുടെ അടിസ്ഥാനത്തിലാണ് മറ്റു പ്രതികളെ തേടി തൊടപുഴ സി.ഐ എന്‍.ജി ശ്രീമോന്റെ നേതൃത്വത്തിലുള്ള സംഘം ഒഡീഷയിലേയ്ക്ക് പോയത്. കഠിന പ്രയത്‌നത്തിലൂടെ ചിങ്കുവിനെയും രമേശിനെയും അവിടെ നിന്നും അറസ്റ്റ് ചെയ്യുകയായിരുന്നു.
കേസില്‍ ആറ് സാക്ഷികളെ വിസ്തരിച്ചപ്പോഴേയ്ക്കും നാല് പ്രതികളും കുറ്റം സമ്മതിച്ചിരുന്നു. പ്രോസിക്യൂഷനു വേണ്ടി ഡപ്യൂട്ടി ഡയറക്ടര്‍ ഓഫ് പ്രോസിക്യൂഷന്‍ ബാലചന്ദ്രമേനോന്‍ ഹാജരായി.