അമ്പലപ്പുഴ: പ്രതികളെ തേടി ആശുപത്രിയിലെത്തിയ പോലീസുകാര്‍ക്ക് നേരെ ആക്രമണ ശ്രമം. തുടര്‍ന്ന് അക്രമികള്‍ റേഡിയേഷന്‍ വിഭാഗത്തിലെ ചില്ലുകള്‍ തല്ലിത്തകര്‍ത്തു. 30 പേര്‍ക്കെതിരെ പോലീസ് കേസ് എടുത്തു.
അമ്പലപ്പുഴയില്‍ ഡി വൈ എഫ് ഐ പ്രവര്‍ത്തകര്‍ക്ക് വെട്ടേറ്റ സംഭവുമായി ബന്ധപ്പെട്ട കേസ്സിലെ പ്രതികളെ അറസ്റ്റ് ചെയ്യാനായി വണ്ടാനം ആശുപത്രിയിലെത്തിയ അമ്പലപ്പുഴ എസ് ഐ പ്രജീഷ് കുമാറിന്റെ നേതൃത്വത്തിലുള്ള പോലീസ് സംഘത്തിന് നേരെയാണ് എസ് ഡി പി ഐ പ്രവര്‍ത്തകര്‍ ആക്രമണം അഴിച്ച് വിടാന്‍ ശ്രമിച്ചത്. തുടര്‍ന്ന് പ്രകോപിതരായ പ്രവര്‍ത്തകര്‍ ആശുപത്രി റേഡിയേഷന്‍ വിഭാഗത്തില്‍ ചുറ്റപ്പെട്ടിരുന്ന ചില്ലുകള്‍ അടിച്ച് തകര്‍ത്തു.
കഴിഞ്ഞ രാത്രിയിലായിരുന്നു സംഭവം. കസ്റ്റഡിയില്‍ എടുത്ത പ്രതികളെ കൂടാതെ കണ്ടാലറിയാവുന്ന ഏതാനും പേര്‍ക്കെതിരെയും അക്രമത്തിന് ഇരയായവര്‍ പോലീസിന് മൊഴി നല്‍കിയിരുന്നു.
എന്നാല്‍ പ്രതികള്‍ ആശുപത്രിയിലെത്തിയിട്ടുണ്ടന്ന വിവരത്തെതുടര്‍ന്ന് ഇവിടെ എത്തിയ പോലീസിന് നേരെയാണ് ഒരു സംഘം എസ് ഡി പി ഐ പ്രവര്‍ത്തകര്‍ ആക്രമണം അഴിച്ച് വിട്ടത്. അക്രമത്തെ തുടര്‍ന്ന് പോലീസിന് പ്രതികളെ പിടികൂടാന്‍ കഴിഞ്ഞില്ല. പോലീസ് സംയമനം പാലിച്ചതിനാല്‍ സംഘര്‍ഷാവസ്ഥ ഒഴിവായി. തുടര്‍ന്ന് കണ്ടാലറിയാവുന്ന 30 ഓളം എസ് ഡി പി ഐ പ്രവര്‍ത്തകര്‍ക്കെതിരെ പോലീസിനെ ആക്രമിക്കാന്‍ ശ്രമിക്കല്‍, സംഘം ചേരല്‍, പൊതുമുതല്‍ നശിപ്പിക്കല്‍ തുടങ്ങി ജാമ്യമില്ലാ വകുപ്പ് പ്രകാരം കേസ് എടുത്തതായി പോലീസ് അറിയിച്ചു.